Yesu Nuydh Nungu Koeykoeyne Niyay Kazi Thuremoemoedhin
51Wara goeyginu Yesu nuy malu buwadhoenu mer. Malu nel Ganasareth. Nuy si sir kasa kedha mabaygaw moeyay mina koeyza mamu zug nanamoeyr nubiya mura doegamuya. Thana nungu mawpa koeyma ubin memayir, Awgadhaw yoepa koerngaypa. 2Nuydh ukasar wapi gasamay but imamoedhin thawala gimal. Thana wapiw zagethaw mabaygal kay Adhal thawala; thana pingel garwalgamoeyr.
3Wara wapiw gasamay mabayg thanamulngu nel Simona. Yesu pathaydhin Simonan butanu a nubepa muliz kedha, “Ngidh gar moegina Adhapa, guythuyaypa nan but lagaw buwadhoengu?” Wa, nuy Yesu si pathaydhin. Nuy Apa thanuraydhin a nuydh ngurpay Ayman thanamulpa, mura mabaygoepa, Adhaz malungu. 4Ngurpay na muwasin nanga Yesu kedha mulaydhin Simonalpa, “Ngitha nan but Adhapa thapar malupa, pingepa lak thoeyaypa.”
5Nuy Simona kedha mulaydhin, “Kuyku Mabayg, ngoey mura kubilu koeyma nuthemirngu wapipa, kubil kuthal marngu kasa moegan wapiginga, kasa kay kedha, nginu ya ngath kay pinge thoeyaypa.” 6Kalanu thana thayamoeydhin pingel. Thana wapil mina koeygarsar gasamoeydhin, pingel mina Amadhan pakadamay. 7Thana thanamun zagethaw igalgoepa geth Aymoeyn wara butangu thanamulpa ibupudaypa. Kalanu sepalbi but mura gudiya yoewdhiz wapilnga, mina Amadhan dudupay.
8Simon Petherulpa kakal kedha ina ngadha thoeyay mina wardh, nuy kulun pasayniz Yesuniya parunu, a kedha mulaydhin, “Kuykulnga, ngi ngawngu uzar, ngay kasa wati pawa mabayg, ngay ngibepa matha ngoedhagidh lawnga.” 9Nuy a nungu zagethaw igalgal, thana mina koeyma madhu pamemidhin kedha, gasamayzi wapil mina koey garsar.
10Zemes a Yoewane ukasar kuyk kazi Zebadin, palay wara butaw mabayg. Palay a Simona mura thonara zageth kazil. Palay lak kedha mina madhu pameman. Yesu kedha mulaydhin Simonalpa, “Ngi Akan maygi, ngitha bangal ngaw pingew thoeyay mabaygal kedha zagethoepa, ngitha bangal mabaygal garwoedhamoeypu.” 11Thana palbi but kadaypa yoewthemoedhin thawaliya, mura zapul wanaydhin, kalanu Yesuniya wagel Asimoeydhin.
Yesu Wati Kikirilayg Balbay Tidan
12Wara thonara nuy Yesu mudhaw lagoenu; nuy mabayg si kikirin pungaypu, wati goengawl kikirilayg. Nuydh kikiril mabaygan Yesun imadhin, nuy ngapa nubiya kulun pasayneydhin. Nuy yoewdhaydhin Yesuniya kedha, “Kuykulnga nginu ubi nanga Ngibepa zagethoeginga kedha, ngidh ngoena balbayg poelaypa; a ngaw gamu bangal pudhunga Aymiz.”
13Yesu nanga nuyn imadhin nungu mina koeyma koerkak badh miyaydhin. Nuydh nungu geth luwayadhin a gasamoedhin nuyn a kedha mulaydhin, “Wa ngaw mina ubi kedha ngath kay ngin balbayg poelaypa. Ngi balbayg Asir kedha thonar nginu kikiringu.” Mina sobaginga nuy balbayg Asidhin.
14Kalanu Yesu nubepa koeyma mulaydhin kedha, “Wara mabaygoepa mulayg, ngi balbayginga uzar misnarepa nuydh kay ngin zoeyzoey nidhepa a mina yapathamaypa kedha, ngi balbayg Asin. Sew kalanu kay ngi mer koey yoewthoepa Aymaypa nginu eso uruy poeyban; ina Mosen sabi yawoedhayzinga, mura mabaygoepa imaypa kedha ngi balbayginga mabaygiya oesipa.”
15Wa, Yesu nuyn gud wadhadhin kasa kay na ya pungaypu mabaygiya Adhapa war lagiya. Mabaygal na karngemipu nanga thana ngapa nubepa koerngaypa, koey garsar mabaygal. Thana ngapa toedipu koerngaypa Yesun mina ya a nubepa thanamun kikiril mabaygoepa balbayg tidaypa. 16Nuy ngaru Adhapa thamepu yagi dhadhabuthoepa, lak nuydh mina thonara gasampu nungu Thathipa thoeythupoegaypa.
Magawgi Mabayg Gamu Soersimayginga Yesu Balbay Tidan
17Wara goeyga Yesu ngurpay Aymar mabaygoepa. Dhuray parasayalgal a sabiw ngurpay mabaygal lak si nir. Thana garwoeydhamoeydhin mura goegathoengu, Galilayoengu, a Yoewdhayangu, a matha kedha ngapa Yoerusalemoengu. Kuykulmay woenab koey bibirilnga ngaru Yesuniya senabi thonara kikiril mabaygoepa balbay tidaypa.
18Dhadhal nanga wara mabaygal mangemidhin thana ngapa Angadhin dhag kikirilayg, magawgig. Thana nuyn thoeridhar nuy uthuy lagoenu yoewir. Thana muya yoewthaypa nuthemir Yesulpa, nuyn parunu wanan. 19Mabayg koeygarsar, thana yan nuthemin Yesulpa gasamaypa. Thana kadaypa thodhoepa nuyn thoeridhan; Arkath Ayman lagaw thodhanu, balbayginga Yesuniya gimal. Thana nuyn senabi kikirilayg Arkathiya mulupa madhin Apal wakunu yoewthan Yesuniya parunu.
20Yesu na imadhin thanamun mina yoepathaman koeyza nuy dhagoepa ya mulaydhin kikiril gamupa, “Ngaw igalayg, nginu mura wati pawal gud woeyamoeyn.”
21Dhuray sabiw ngurpay mabaygal thana kalmel nir a parasayalgal thana thanamuniya muynu kedha umamoeyr “In mabayg nga yadu umepa, Awgadh mogo pugan! Matha Awgadhaw kupay kedha nuydh gud wayan wati pawa!”
22Yesu senabi thonara ngulayg Asidhin thanamun wakay thoemamay midh nanga, nuy thanamulpa mulaydhin kedha, “Ngitha mingu senawbi wakay thoemamipa? 23Ngitha koey ngulaygal kedha palbi ukasar zageth ngaru kalmel za, wara kedha ngay kikiril mabaygoepa muliz, ‘Nginu mura wati pawal gudwoeyamoeyn.’ lawnga ngay na kedha muliz, ‘Kaday tari a kusumar nginu uthuy rugal a mab uzar lagoepa.’ 24Ngath ngithamulpa kakal Ayman kedha, Mabaygaw Kazi kupaylnga ina Apal gud woeyamoeyn mabaygaw wati pawal.” Kalanu nuy dhagoepa buwayl thayadhin a mulaydhin, “Ngay ngibepa muliz kedha, kaday tari, nginu uthuy zapul kusumaw a lagoepa uzar!” 25Thanamuniya parunu thana nagemir, nuy kikiril mabayg, kaday thariz, kusuman nungu uthuy rugal, uzariz lagoepa. Nuydh Awgadh mina koeyma thawmadhin.
26Mabaygan mura mina koeyma madhu pamemidhin, thanamun Aka koeyza. Thana koeyma Awgadh thawmadhin kedha, “Ngoey kedha kapu ngoedhal za kulay imayginga, ina kayib miza nanga.”
Yesun Lebin Thuran
27Senabi kalanu Yesu uzaraydhin Adhapa, a imadhin bokadhzoengu garwoeydhamay mabayg nel Lebi, nuy muynu nungu zagethaw lagoenu. Yesu nubepa muliz, “Ngaybiya Asir.” 28Nuy matha koerar Asin zapul mura nungu waniz a nuy Asin Yesuniya.
29Kalanu Lebi koey Ay Ayman nungu lagoenu Yesulpa, a nungu niyay kazil a koey garsar dhuray mabaygal kalmel, bokadhzoengu garwoeydhamay mabaygal a wara mabaygal. 30Dhuray parasayalgal, a sabiw ngurpay mabaygal thana iman, Yesun Aygudan kalmel sethabi pasipa imay mabaygal a bokadhzoengu garwoeydhamay mabaygal. Thana nungu niyay kazipa yapu poeybemidhin, “Ngitha mingu kedha wati mabaygiya kalmel Ay purthaypa a ngukiw wanimpa, bokadhzoengu garwoeydhamay mabaygal a pasipa imay mabaygal?”
31Yesu thanamulpa kuniya muliz kedha, “Mabayg nanga kikirigig, nuy doktapa ubin mayginga, mabayg nga kikirilayg, wa nuy ubin miziz. Ngay ngapa mayginga mina mabaygoepa thuraypa, ngay ngaru wati pawa mabaygoepa thanamulpa buwayl idimpa Awgadhoepa.” 32Ngay ngapa mayginga mina mabaygoepa thuraypa setha ngaya nanga kedha, thana matha ngoedhagidh, ngath ngaru thuran ibuypuydhan wara mabayg, wati pawa mabaygal thanamulpa garthil thoeyaypa.
33Wara mabaygal Yesulpa kedha, “Yoewane Papthayson niyay kazil a matha kedha mura parasayalgaw niyay kazil ngulayg Aygudoegasimoeypu Awgadhoepa Apasin, a thoeythu pagemipa, koey garsar thonaralnga. Midh paru nginu niyay kazil matha Ay purthaypa?”
34Yesu thanamulpa kedha Adha min tidan, “Gethaw garwoeydhamay Ay nanga, koey zageth mabayg Aygudoeginga garwoeydhamayzi mabaygaw parunu. Nuy niyaypa yoelpayzi garkaz, nuy nanga sena kalmel mabaygan ngaru mura gasaman, Aygudaginga lawnga. 35Wagel bangal koey thonar gasamoene a nuyn niyaypa yoelpayzi mabayg Adhapa manin thanamulngu. Senabi thonara kay thana Aygudoegasimoeyn.”
36Yesu lak wara ya matha ngoedhoegidh Aymoedhin thanamulpa, “Koey zageth mabaygan kayn sodh pakadaman, pasis gasaman nanungu a kulba sodhanu woeydhan. Lawnga na gegeyadh nuydh gegeyadh manin kayn sodh a wara kedha sena kayn dhoemawak matha ngoedhagidh lawnga kulaba sodhanu woeydhan.
37“A matha kedha umal ngukiw za, uruy goengaw Aymayzinga. Kulba goengaw ngaru piranga, mabaygoepa matha ngoedhagidh lawnga kayn umal nguki malan kulba goengawya; kedha nanga sik waliz mina koeyma Arkath dhanaman, mura idiman umal nguki a uruy goengaw. 38Kapu za kedha kayn umal nguki nanga nan ngaru kayn uruy goengawya malan. 39Nga nanga kulba umal ngukiw woenilayg nuy ngaru kayn umal nguki ubiginga. Nungu wakay thoemamay kedha, kulba nguki ngaru balbayginga. Ngitha sike kayn ngurpayngu ubigigal.”,