Yesun Kazimay Thonar
21Senabi thonara nanga, wara Romaniw Adhapudhay mopakuyk meparuy, nungu nel Augustus. Nuydh ya madhin kedha, “Mura mabaygaw nelay ngaru getha tiday mabaygoepa poeybamoeyn, mura thanamun goegathiya.” 2Senawbi thonara thanamun kuyku mabayg sey Siriyaw doegamoenu nel Koewiriniyus. Sena waza thanamun mina koeykoeyne, mabaygaw getha tiday Koewirininsan thonarnu.
3Wa, mura mabaygal ngaru thanamun lagoepa, nelpa poeybaypa getha tiday zagethaw mabaygoepa. 4A thanamuniya muynu Mariyana maku thoeyayzinga Yoewsepa, nuy lak miyaydhin moegina goegathoengu, Nazarethoengu, Galilaya doegamoengu. Nuy Kuniya nungu Kazimay lagoepa, goegath Bethliyama Yudhayanu. Thanamun Kulkubaw mopa Kuyk Dhawitha lak senawbi goegathoenu kazi madhin, a Yoewsepa nuy Dhawithan buway mabayg. Nuy Kedha zoenguz Bethliyamapa miyaydhin.
5Nubiya Kalmel nungu maku thoeyayzi yoepkaz Mariya, palamulpa palamun nelpa mulaypa zagethaw mabaygoepa. Na Sinubi thonara mapunga. 6Thana sey Bethliyamanu nanga nanu Kazimay thonar gasamadhin. 7Nadh nanu Kuykuy kazi imadhin thurkuyay kazi. Nadh nuyn dhumawakun nuradhin a powbiyaw lagoenu muynu wanadhin nuyn; kedha zoenguz kedha, thanamulpa waza buthaginga uthuypa mura lagal.
Mamuy Danal Poethay Mabaygal a Awgadhaw Angelal
8Dhuray mamuy danal poethay mabaygal sey Adhal bupanu. Senabi kubilu thana thanamun mamuyl danal pathar. 9Kedha nanga thana imadhin Awgadhaw woeyayzi Angela, thanamulpa tharaydhin, senawbi thonara Awgadhaw buya a poerapar thanamuniya nagaydhin. Wa, thanamun mamuy danal poethay mabaygaw Aka mina koey zapul.
10Kasa kay kedha nuy Angela kedha mulaydhin, “Ngitha Akan maygi, ngath kapu yangukudu oengaypa ngithamulpa a matha kedha mura moebaygoepa, ikal dhiwal yangukudu. 11In nubi goeyginu ngithamulpa ngithamun kaludhay mabayg dan Adhanu, sey Dhawithan goegathanu. Nungu nel Keriso, ngithamun Kuykulnga, Awgadhaw mina Adhapa thamayzinga. 12Ngithamulpa bangal kakal, ngitha bangal nuyn mapeth imane powbiyaw lagoenu muynu nuy dhoemawakun Abayzinga. Nuyn Awgadhan kedha maku thayadhin.”
13Senabi thonara koey garsar daparaw Angelal danapa yakamoeydhin. Thana na puyamar Awgadhoepa thawmaypa kedha,
14“Awgadh nuy ngaru woenabaw a poerapoeraw Awgadh
sey gimal dapara,
A in Apal kapu woenab, a pawdh ngithamulpa;
minguz kedha, mabaygal nanga balbayginga Awgadhaw purkapa.”
15Thana nanga Angelal kuniya tidemidhin daparpa, thana mamuy danal poethay mabaygal mulemin kidhakidhan, “Ngalpa ladhuypa, Bethliyamapa senabi zoepa purkaw imaypa, Kuykulmaypa midh na mulaydhin ngalpalpa.” 16Thana sobaginga ladhudhin; imadhin Mariya a Yoewsepa a mapeth muynu poebiyaw lagoenu yoewir. 17Thana nanga mamuy danal poethay mabaygal mapeth imadhin, thana yadu thuray Aymoedhin Apu-thathipa, Angelal thanamulpa midh na umamoeyr senawbi mapeth yadu palgadhin.
18Mura mabaygal ngadh na karngemidhin thana koeyma madhu pamemidhin mamuy danal poethay mabaygal midh na umamoeyr thanamulpa. 19Mariya mina koeyma ngoenanu mamayidhin sethabi yaday a koeyma kuykunu wanamoeydhin. 20Thana nanga mamuy danal poethay mabaygal kuniya tidemidhin, thana koeyma thawmadhin Awgadh, thana midh na karngemidhin a imaydhin, Angelal midh na umamoeyr thanamulpa.
Yesun Nel Tharan
21Urapun wiki kaliya, thonara nanga gasamoedhin moegina mapethoepa motho poethaypa, thana nuyn nel tharadhin Yesun, Angelaw poeybayzi nel. Wagel kay Mariya maythalayg, Angela kulay Mariyalpa mulaydhin.
Thana Mapeth Yakamoedhin Koey Yoewthanu
22-23Thanamun senabi thonaraw igililnga kedha, Mosen minar poelayzimaynu muynu kedha, “Matha kuykuy garkaz kazil ngaru Awgadhoepa kuniya poeyban a eso manin.” Mariya nanga puduya Adhadhin palay Yoewsepaw kazi oengadhin Yoerusalemaw koey yoewthoepa, Awgadhoepa yadu poelgaypa, a eso maypa. 24Palay sipa Aymoeypa mura sabiw yawoeydhayzinga midh nanga, ukasar moegina uruy ngaru Awgadhoepa mamaman. Sethabi moegina uruyl goeynaw ngoedhalmayl.
25Senawbi thonara Yerusalemoenu mabayg meparu, nungu nel Simiyon, nuy mina Awgadhiya gathil thoeyayzi mabayg a Maygi Mari waza nubiya kalmel. Mura nungu thoeythu poegaynu muynu ubi kedha, kurusipa bangal nungu danal Isoereylaw buway koerkak badh bangal balbayg Asine; 26kalmel nubiya Maygi Mariw ibupuydhay, kuykunidhaypa Awgadhaw Adhapa Thoemayzi Mabaygoepa imaypa, wagel nungu kuth.
27Maygi Mariw yoelpadhin Simiyonan koey yoewthaw boeradharoepa muypa senabi thonarnu. Senabi thonaraw Yoewsepaw Mariyaw palay palamun kazi Yesun yoewthiya muy thayadhin mura zoepa balbayg poelaypa, thanamun sabi midh nanga. 28Simiyon nuydh kazi thoeridhaydhin nungu gethan palamulngu, gamupa gasamoedhin a Awgadhoepa eso pugaydhin kedha,
29“Kuykulnga, ngidh nginu yawoeydhayzinga kuyku nidhan,
A ngaw zageth ina Apal mura muwasin;
ngidh ngoena pawoeyar mura kay balbayginga,
matha kedha nginu kulba yangukudu midh nanga.
30Minguz kedha, ngath ngaw purkan iman
nginu Adhapa Thamayzi Gudaz Puydhay Moebayg.
31-32Ngidh nanga mura mabaygaw danal buth pathadhin kedha,
nuy bangal nginu buya mekath Azaz moebaygoepa yakamoeypa,
nginu mina igililmay yabugud,
A Adhapudhay woenab a poerapar yakamoeypa Isoereylaw mabaygiya.”
33Palay kaziw Apu-thathi mina koeyma madhu pamemoedhin Simiyonan yangu, palamun kazipa. 34Kalanu Simiyon kuyku nidhadhin thanamuniya a kaziw Apupa kedha mulaydhin, “In nubi kazi Adhapa thamadhin Awgadhaw koey zagethoepa Aymoeypa. Nungu may dhuray bangal Isoereylaw mabaygal mulupa idimpu a dhuray bangal kadaypa gasamipu. Nuy bangal ngoedhe Awgadhaw maku thoeyayzinga, kasa kay kedha koeygarsar mabaygal nubepa kuniya lak bangal koey dharadh umamoeypu. 35Minguz kedha, thanamuniya wara wati wakay thamamay muynu Awgadhaw Sey Sithamayzi Moebaygoepa. Wa, thanamun kedha wati wakaythamamayil bangal kakal Aymidhe. Nginu koerkak badh a ngoenakap mapu bangal Adhapudhay koeyza ngoedhe nginu ngoenakapoenu kulka yoewdhepu.”
36-37Wa, senabi thonara lak mina koey Apu peropetha meparu; nanu nel Ana na Panuwelan kazi, na Asan buway mabayg. Na 84 wathalayg a nanu Alay mina kulkub um miyaydhin, palamun niyaypa yoelpay wathal matha seben mura. Kalanu nadh yoewth gamupa gasamoedhin. Kubilu goeyga na Aygudoeginga matha thoeythu pagepu. 38Na balbayginga mina senabi thonara mangaydhin, Awgadhoepa eso pugaydhin kazipa, a mulaydhin kapu ya kaziw dagumuya mabaygan ngaya nanga ugadhin Awgadhaw thonara Yoerusalemoepa gudaz puydhaypa.
39Kalanu palay Mariyaw Yoewsepaw mina mura Aymoedhin Awgadhaw poeybayzi sabiw ubilnga, kalanu thana kuniya tidemidhin thanamun lagoepa, Nazarethoepa Galilayoenu muynu. 40Nuy kazi si koesimadhin, koey magawlnga, a mina koey gudal ngulayg moegina kaz, a Awgadhaw woenab nubiya kalmel mura thonara.
Yesu Nanga 12 Woethalayg Aymaydhin Nuy Yerusalemoepa Miyayadhin Thoeytu Poegaypa Muynu Koey Yoewthanu
41Wa, mura woethiya Yesun Apu thathi Yerusalemoepa memampu Kaludhay Ay Aymay thonarpa. 42Yesu nanga twoeylop woethalayg Aymoedhin thana lak memayidhin thanamun pawa midh nanga; 43Ay Aymay nanga muwasidhin, thanamun mab kuyk Aymaydhin lagoepa kuniya, kasa kay kedha Yesu nuy yaw pugaydhin kuniya Yoerusalemoenu. Nungu Apu thathi koerawayg kedha nuy palamun mabaygiya kalmel oesiginga. 44Palamun wakay thoemamaypa kedha, nuy mabaygaw mopanu kalmel, palay kedha zoengu kay woenag.
Kurusipa kutapa palay lumadhin nuyn palamun igalgoepa a tukuypoepa yapupoeybemar. 45Palay nuyn yan lumar, kalanu palay kuniya tidemoedhin Yoerusalemoepa, nuyn lumadhin.
46Kurusipa thoeri goeygilnga nanga palay nuyn imadhin muynu koey yoewthanu. Nuy nir thanamun yoewthaw sabiw ngurpay mabaygiya, kurusipagay thanamulpa, a yapu poeybay mura moegithap sabi muynu. 47Mura setha ngaya nanga nungu yoepa kurusipagemir nuy kuniya midh nanga umay thanamulpa ngurpay mabaygoepa, thana mina madhu pamemidhin kedha, nungu ngulayg mina koeyza. 48Nungu Apu thathin nanga nuyn imadhin koey yoewthanu muynu, palay mina madhu pamemidhin. Nungu Apu kedha nubepa, “Ngoezu kazi, ngidh midh paru kedha Aymoenu ngalbelpa? Nginu thathi a ngay, ngidh ngalbe mina wakay thoemaypa mamamoenu imaypa lumarngu ngin.” 49Nuy kedha palamulpa, “Mingu ngipel ngoena lumarngu? Ngipel nay ngulayg kedha ngay ngaru ngaw Thathiw lagoenu muynu?”
50Kasa kay kedha palay tidayginga nungu ya nuy palamulpa kuniya midh nanga mulaydhin. 51Nuy kalanu Asidhin palamuniya kuniya Nazarethoepa, a koey kurusipoegayl kazi palamulpa. Nungu Apuwan mura thabi zapul thabi ngoedha thoeyay nanu ngoenakapoenu muynu gasamoeypu. 52Yesu koesimaydhin kalmel koey ngulayg a gamu magaw mina balbayginga Awgadhaw parunu a mabaygaw parunu.