Yesu Nuydh Thuradhin Bokadhzangu Garwoeydhamay Mabayg Nel Zakiyoes
191Yesu a nungu niyay kazil, goegath Zeriko thana muya uthemidhin, mab thanamun woelmay. 2Nuy wara kuyku bokadhzangu garwoeydhamay mabayg nungu nel Zakiyoes, nuy si niparuy, nuy koey zapulayg. 3Nuy koeyma nuthepu Yesulpa imaypa, nuy koey thawpay mabayg, Yesun imayginga, mabaygaw kubiya. Nuy muynu wakay thayiz, thanamulngu mabayg nga Yesu. 4Nuy tari zilamiz mabaygiya kulay thayiz a waliz kadaypa koey puya, Yesulpa imaypa, nungu kay mab ulaypu sinaki.
5Yesu nanga senabi lag gasaman, nuy kadaypa nagiz, a Zakiyoesalpa kedha muliz, “Zakiyoes, ngapa tharay mulupa pagar. Kayibaw goeyginu ngay kay ngaru nginu lagoenu kalmel.” 6Zakiyoes sobaginga mulupa pagan a gud woeydhiz Yesun koey ikalnga.
7Mura mabaygal thana na iman nanga thana dhubdhub ya mulemin, a ubigigal kedha, “Nuy midh paru sepa wati pawaw mabaygaw lagoepa?” 8Kasa kay kedha nuy Zakiyoes kaday tharaydhin a mulaydhin Kuykulmaypa kedha, “Kuykulnga, kurusipagi ngayapa, ngath kedha thonara ya Ayman kedha, mura zapul ngaw dhadhiya mamayin, ukasar doegampa a wara doegam ngath Aygi zagi mabaygoepa mamayine. a wara kedha, ngath nanga gethal oengay Aymadhin kulay, ngaw yangukudu kedha, ngath kuniya modhabiya manin po thonaralnga gimal kabuthan.”
9Yesu kedha mulaydhin, “Wa, ina balbayginga mangiz nubi lagaw mabaygiya, Awgadhan nuyn kaludhan kayib. Nuy lak kapu Akasin, matha kedha nuy Abraman buway mabayg.” 10Mabaygaw Kazi ngapa lumaypa a kaludhaypa mabaygal ngaya guythuyayzimayl.
Yesun Adha Min Tidayzi Ya Ten Koethil Bokadhzoepa
11Wa, thana kurusipagemir Yesulpa, nuydh thana ngurpamoeyr. Nuy Amadhan Yoerusalemoepa, a mabaygaw kasa wakay thoemamay kedha, Awgadhaw basalaya ngaru kakal iman senabi thonara. Lawnga, na kasa thanamun wakay thoemamay kedha, 12Nuydh thanamulpa ngurpay yadu umay kedha, “Wara koey mabayg, nungu mina thonar gasamoedhin nubepa koey sigal goegathoepa, thanamulpa nubepa kuykulnga Aymoeypa. Nungu ubilnga kedha thana nanga nuyn kuykulnga Ayman, nuy lak kuniya lagoepa. Nungu niyay lag ngaru sey.
13“Wagel kay nuy geth wanaydhin nuydh thurimoeydhin ten zagethaw mabaygal nungu zagethaw mabaygoengu. Nuydh thanamulpa yaynanob madhin urapun bokadhza koethilnga. Nuy thanamulpa kedha mulaydhin, ‘Ngitha bangal koesimoene sethabi bokadhzapul, kurusipa bangal ngay kuniya tidhedhe.’ 14Kasa kay kedha nungu goegathaw mabaygal nungungu Asimoeyginga; thana mabaygal yaday wayaydhin kedha, ‘Ngoey ubigigal kedha nubi mabayg ngoeymun kuykulnga.’
15“Lawnga, nuyn ngaru kuyku mabayg Aymoeydhin; kalanu nuy ngapa kuniya. Sobaginga nuydh nungu zagethaw mabaygal garwoedhamaydhin nubepa, imaypa kedha thanamun bokadhzoengu zageth thana midh Aymoeydhin.
16“Nuy kulay mabayg ngapa muliz, ‘Kuykulnga, ngath koesimoedhin nabi bokadhza koethilnga, Aymoedhin wara ten koethil bokadhzapul.’ 17Nuy kuykulnga kedha mulaydhin, ‘Nginu zageth matha ngoedhagidh, ngidh moegina zageth matha ngoedhagidh oengadhin. Wa, ngath ngibepa manin ten goegathal, ngi thanamun kuyku mabayg Aymiz.’
18“Nubiya wagel ngapa kedha muliz, ‘Kuykulnga, ngath koesimoedhin nabi bokadhza koethilnga, Aymoedhin wara payb koethil bokadhzapul.’ 19Nungu kuyku mabayg kedha mulaydhin, ‘Wa, itha nginu payb goegathal, ngi bangal sew kuyku mabayg.’
20“Lak wara zagethaw mabayg ngapa. Nuy kedha mulaydhin, ‘Kuyku mabayg, ina nginu koethil bokadhza, ngath kasa Aradhin dhoemawakunu muynu. 21Ngath kedha zoenguz wardhadhin, ngay Akan nginungu kedha ngi koey yadayg, ngidh kasa zagethoeginga za gasaman, a matha kedha Ayboedhaw thonara ngidh Ay gasaman wara mabaygaw uthuyzimayl.’ 22Nuy kuyku mabayg nubepa kedha mulaydhin, ‘Ngi wati zagethaw mabayg, nginu geth yangukudu na ngin idimoene. Ngi kedha, nginu purkapa kedha ngay koey yadayg, a ngath kasa zagethoeginga za gasaman, a matha kedha Ayboedhaw thonara Ay gasaman wara mabaygaw uthuyzimayl. 23Kedha nanga nginu imaypa nanga ngidh mingu ngaw bokadhza muynu bokadhzoengu sakariya thoeyay lag oerayginga. Ngay nay ngapa kuniya ngath balbayginga gasaman, ngaw bokadhza moegina gimal nay.’
24“Kalanu kuyku mabayg wara mabaygoepa muliz, mabaygal si ngaya na memeyir, ‘Sena nungu koethil bokadhza nungungu Adhapa mar, a sepa mar sena nga nanga ten koethil zapulayg.’ 25Thana nubepa kedha mulemidhin, ‘Kuykulnga, nubiya memayipa ten koethil zapul.’
26“Nuy kuyku mabayg kedha mulaydhin, ‘Ngay ngithamulpa muliz, mabayg nanga koey zapulayg, lak gimal kabuthan nubepa, a mabayg nanga zapugig, nungu moenarimayl zapul mura Adhapa mamayin nungungu.’ 27A nungu kuyku mabaygaw wara ridha yangukudu kedha ‘Setha ngaw wati igalgal ngaya nanga ngawngu ubigasimoeydhin ngay thanamun kuyku mabayg, thana mura ngapa mamayi koepa. Thana uma mathamoey ngaw parunu.’”
Koeyma Mabaygan Yesun Thawmadhin Nungu Yoerusalemaw Mangay
28Yesun senabi ngurpay kaliya nuy Yoerusalemoepa miziz, mabaygiya kulay. 29Nuy nanga Amadhan Aymiz ngapa ukasar moegina mudhaw lagoepa Bethpayz a Bethoeni, palay dhadhal Olibaw padoenu, nuy wayamoedhin ukasar nungu niyay kazi kulay, palamun zageth sey sithamadhin kedha, 30“Sepa uzarmariw, goegath sey parunu, ngipel balbayginga imane Asinaw kazi sey kunumayzinga. Mabaygan kulay niyayginga senabi Asinaw kaziya. Ngidh nuyn Adhapa gud wayar a ngapa mar kay.
31“Wara mabayg kay na yapu poeybay, ‘Ngipel mipa gud woeyaypa?’ Kedha kay mulemiriw, ‘Kuykulnga Asinaw kazipa ubin mepa.’” 32Sepalbi kulay woeyayzi niyay kazi kulay uzarmoedhin a mura zapul imaydhin Yesu palamulpa midh na mulaydhin. 33Palay nanga gud wayadhin nuyn Asinaw kazi, thana Asinaw kaziw mabaygal kedha mulemidhin, “Ngipel mipa gud woeyaypa?” 34Palay kedha, “Kuykulnga ubin mepa.”
35Wa, palay madhin senabi Asinaw kazi Yesulpa, kalanu palamun koey sodhal gud paliman senabi Asinaw kaziya, a Yesun gimal nithan. 36Koeygarsar mabaygal sey Yesuniya, thana thanamun dhoemawakul thayamoeydhin Yesun yabugudiya poeydhamoeyn, nungu uruy yabugud mina balbayg poelaypa.
37Thana nanga Olibaw padaw guyanu thardhamoeydhin, mura nungu puziw mabaygal gima gudiya thawmadhin Awgadh, koey ikalnga, kedha zoenguz kedha mura Adhapudhay zagethal nungu, thana imadhin. Thana kedha,
38“Awgadhaw woenab nubepa, Mopakuykupa,
nga ngapa Awgadhaw zagethoepa oengaypa,
A nungu nel.
Dapara gimal bangal pawdh,
A poerapar bangal gimal ngaru.”
39Parasayalgal wara si mabaygiya muynu. Thana kedha mulemidhin Yesulpa, “Ngurpay mabayg setha nginu gamu puziw mabaygal lawnga mamayir.”
40Yesu kedha muliz, “Ngay ngithamulpa kedha, ngitha thana woerdhayg, thana ngaru Ayman. Mabaygan nanga thawmayginga, wa, nubi thawmanin ngaru ngapa matha kedha kulangu.”
41Yesu na ngapa Amadhan Aymiz Yoerusalemoepa, nuydh na imadhin senabi goegath nungu ngudi suleman, koerkak badhan. 42Nuy kedha mulaydhin, “Ngitha Yoerusalemaw mabaygal, ngitha nay ngulaygal kayib, ngithamun pawdhaw pawa midh; lawnga ngitha imayginga, ngitha koerawaygal. 43Wati thonar bangal ngapa gasamoene; ngithamun thabukiriw mabaygal senabi thonara mina wati koewbu rugal moeydhamoeyne nabi koey goegathaw, yabugudaw pasi yathay bangal zilmemine. 44Thana bangal ngithamun mura mathamoene, a matha kedha ngithamun moegina kazil muynu. Wara urapun lagaw kula gimal woenaypa lawnga, mura lag idimoeyn, kedha zoenguz kedha, Awgadh ngithamuniya mangiz zagethoepa, a ngitha koerawaygal.”,
Yesu Muy Yoewthaydhin Koey Yoewthiya
45Kalanu Yesu muy yoewthiz koey yoewthiya, a nuy butha poethay zageth kuyk Aymoedhin muynu yoewthanu. Zangu sakariya thoeyay mabaygal nuydh koey dharadh Adhapa wayayamoeyn. 46Nuy thanamulpa kedha mulaydhin, “Awgadhaw yangukudu minar poelayzinga kedha, ‘Ngaw niyay lag, bangal mabaygaw thoeythu poegay lag, kasa kay kedha ngitha wati mabaygal nan puru mabaygaw lag Ayimpa.’”
47Mura sethabi goeygil Yesu nungu ngurpay matha Ayimpu muynu koey yoewthanu. Thana kuyku misnarel, a sabiw ngurpay mabaygal, a matha kedha Yoewdhayalgaw koey mabaygal, thana ubin memayipu Yesulpa mathamoeypa. 48Kasa kay kedha thana yabugud gasamoeyginga Aymoeypa, kedha zoenguz kedha, mabaygal mura nubepa koeyma kurusipagemipu.