161kalanu Yesu nuydh za thonar tidan nungu niyay kazipa kedha, “Wara koey Aydeg zapulayg, mabaygal nuyn yadu palgadhin kedha, nungu bokadhzoengu danal poethay mabayg nuy wati mabayg, nuydh kasa nungu kuyku mabaygaw bokadhzapul sagul palepu. 2Kuyku mabayg nuyn thuran a nubepa kedha mulaydhin, ‘E! Ngi midh merngu nginu zagethan? Ngath wara yaday kerngemipu nginu may. Ngidh ngaru ngoena ngulayg palaypa kedha, nginu mura bokadhzoengu zageth midh nanga, mura ngaw zapul. Ngi bangal lawnga ngaw bokadhzoengu mabayg, ngibepa ngath muwasin poeybane.’

3“Nuy bokadhzoengu mabayg muliz kedha nubiya muynu, ‘Ngaw kuyku mabaygan bangal ngoena Adhapa wayane kupayngu. Ngath bangal mi zageth gasamoene Aypa zoepa; ngay matha ngoedhagidh lawnga dharbaw zagethoepa, a ngayapa koey Aziralnga ngay bokadhzoepa yoewdhepu mabaygoepa. 4Wa, ngath igalayg bangal koesimoeyne koeyza, lak bangal thana ngoena muya thoeyaypu thanamun niyay lagiya, ngay bangal zagethoegig nanga.’

5“Kalanu nuydh thuremoeydhin mabaygal ngaya nanga nungu kuyku mabaygoengu umamayl Aymoeydhin. Nuy thanamulpa yaynanob mulaydhin kedha, nuydh thanamun umamaypa mulupa thoeyaypa. Nuy kulay mabaygoepa kedha, ‘Nginu umamayl midh?’ 6Nuy kuniya, ‘100 moegina dramal idilmayl.’ Nuy bokadhzoengu mabayg kedha mulaydhin, ‘Ngoeba mulupa thayan matha 50.’ 7Nuy yapupoeybaydhin wara mabaygoepa kedha, ‘Nginu umamayl midh?’ Nuy kuniya, ‘1,000 baykal kunalmayl.’ Nuy bokadhzoengu mabayg kedha mulaydhin, ‘Ina nginu umanga poelayzinga, ngoeba mulupa thayan matha 800.’ 8Nuy Aydeg zapulayg moegina thawmadhin nungu wati zagethaw mabayg kuyk nuydh koeyma wardhan nungu gegeyadh, a igalayg koesimadhin nubepa. Nubi Apaw goewaw mabaygal setha ngaya nanga yoewthaw kal thoeyayzimayl, thana mina koey ngulaygal thanamun matha ngoedhagidh ngalagaz. Matha Awgadhaw mabaygal koerawaygal.”

9“Matha ngoedhagidh kedha ngidh nubi Apaw goewaw mina zapul balbayginga maypa, a ngibepa igalayg koesimoeypa kay nginu ingaru niyaylagoenu. 10Ngadh nanga moegina zageth balbayginga Angan nanga, wa kakal kedha senabi mabayg balbayginga Angane koey zageth; a ngadh nanga za puru Ayman nanga moegina zagethanu, na gegeyadh, nuydh bangal koey zageth lak kedha gegeyadh oengane.

11“Matha kedha nginu pawa na gegeyadh nanga, nginu igililmay zapa ina Apal danal poethaypa, ngidh bangal daparaw zapul midh danal pathepu. Zoeyzi noeydhay mabaygan koey zageth ngibepa senabi zageth poeyban. 12Wara mabaygaw za nanga ngidh gegeyadh danal poethaypu nanga, mabaygal mura ubigigal nginungu zangu poeybayle nginu geth za, ngi waza wati danal poethay mabayg.

13“Mabaygan koey zageth ukasar kuykupa zagethan meparu. Wara kuyk Awgadh a wara kuyk bokadhza. Wara nuydh maman manin urapun, a wara kuykupa nuy mamagig. Nuydh matha urapun kuyku mabaygaw ubilnga Ayman, a wara kuyku mabayg nuydh Adhapa iman. Nginu ngoenakap nginu bokadhzapunu mepa, ngidh Awgadhaw ubilmayl Aymoeyginga.”

14Thana parasayalgal matha memayipu si. Nungu senabi ngurpay nanga nuydh Ayimpu, thana nuyn mulupa thoeyaypu, minguz kedha, thana koey bokadhzoengu ubilgal.

15Nuy Yesu thanamulpa kedha mulaydhin, “Ngitha ngithamun balbayginga memayipa wara mabaygaw noegaypa, matha Awgadh ngithamun ngoenakapoengu ngulayg. Ngitha nanga kasa mamuy goengaw oengimipa nanga, na mabaygaw noegaypa balbayginga sike, na Abere wati za Awgadhaw imaypa.”

16Yesu lak mulaydhin thanamulpa kedha, “Ngoenanu manin Awgadhaw kulba yabugud mabaygoepa; matha kedha sabil minar poelayzimayl a kulba peropethaw yaday kurusipa Yoewane Papthayson thonara. Sizi pawpa kapu yangu wakay yadu poelgaypu mabaygoepa; kasa kay kedha ngitha koerngayl kawra thoeyayginga. Ngitha midh paru imayginga kedha, mabaygal kayib koeyma nuthemipa gasamaypa senabi mina niyay lag? 17Kasa kay kedha sabi bangal yakanurayg. Na ngoedhe moegina zageth kedha dapar kasa zaginga bangal Aymoene a matha kedha ina gugu ubidh thoeyayzinga mura muwasin, kasa kay kedha Awgadhaw sabi na ngaru koey ridhanga kaday sipa, moegina za nanungu wara guythuyayginga. 18Matha kedha mina garwoeydhamay pawa midh nanga. Mabaygan ipi kuniya wayan, kalanu wara yoepkaz yoelpan; na ngoedhe kedha nge, nuydh puru Ayman wati pawa. a mabayg nga nanga garwoeydhamiz wara mabaygaw kuniya woeyayzi yoepkaziya, nuydh lak puru Ayman.”

19Wa, Yesu thanamulpa Adhamintidadhin kedha, “Wara mabayg koey Aydeg zapulayg. Nuy matha kapu minaral rugan guraypu, a nuy niparuy mura mina ngoedhal zapunu, koey Aygudoelayg. 20Wa, nuy wara mabayg nel Lazaroes, mina Aygig zagig, nungu gamuya mura badhal. Nungu mabaygal nuyn mura goeyginu oengaypu, Adhal pangu pasagudanu wanaypu, senabi koey Aydeg zapulgaw mabaygaw lagoenu. 21Nuy ubin mepa wati Aypa Aygudoepa senabi mabaygaw lagoengu, a matha kedha nungu badhal buth pathayginga, kasa kobegadh umayl ngapa nungu badhiya neythay tadhimoeypa.

22“Kurusipa nuy Aygig zagig um miyaydhin, Angelan nuyn madhin kadaypa, Abramaniya Amadhan nithadhin, koey ikalnga dapara gimal. Kalanu nuy Aydeg zapulayg umanga a moerama thoeyadhin, 23A nuy muynu genanu. Nuydh mina koey gegeyadh kikir gasampu. Nuydh na gima nagaydhin, Abraman koey sigapa imadhin, a nubiya Amadhan Lazaroes.

24“Wa, nuy wal miyaydhin, ‘Thathi Abrama, ngidh nayapa koerkak badh gasampa, ngidh Lazaroesan ngayapa wayar. Kapu za kedha nuydh nungu dhimur ngukinu thardhar woeray, ngaw neypa gabu poelaypa. Ngath gar koey kikir gasampa, ngay in genoenu thoeyaypa.’

25“Abrama nubepa kuniya kedha muliz, ‘Ngi wakay thayiz, ngaw kazi, nginu igililmaynu ngin matha mina zapun guraypu, a Lazaroes nungu mura zapul wati zapul. Wa, kedha thonara nuydh mina koey ika ina gasampa, a ngidh kay gegeyadh gasampa. 26A wara kedha, mina koey moeram ngoebaniya dhadhal, mabaygaw ubi nanga koezi ngibepa gasamoeypa, lawnga koey zageth; a seyzi na nginungu ngapa ngoeymulpa, lak koey zageth.’

27“Kalanu nuy nga nanga kulay Aydeg zapulayg Apa pudhiz Abramalpa, ‘Ngaw thathi, wara kedha ngidh gar Lazaroesan ngaw buwaypa wayar. 28Ngaw payb tukuypal sey, nuyn wayar a nuydh ngulayg palemoeyr thana. Thana bangal koey poeypiyam kedha wati lagoengu mangayle, a kedha koey kikiringu gasamoeyle.’

29“Abrama nubepa kedha mulaydhin kuniya, ‘Minar poelayzimayl thusil sey nginu tukuypoepa ngurpaypa, thana ngaru Moselpa a matha kedha kulba peropethoepa kurusipoegaypa.’

30“Nuy kuniya mulaydhin kedha, ‘Lawnga, ngaw thathi, thana koerngayginga, kasa kay kedha mabayg na kaday tariz umangu uzariz thanamulpa, ngulayg palimoeyn, wa thana karngemin, a garthil thayamin thanamun wati pawangu.’ 31Abrama nubepa kuniya kedha mulaydhin, ‘Thanamulpa nanga Mosen thusipa koerngaypa lawnga, a matha kedha peropethaw minar poelayzimayl, thanamun ngoelkay yoepathaman koeyza kedha, mabayg na kuniya tidiz umangu thanamulpa, thana lak ngoelkay yoepathaman.’”