Yesu Nuydh Kikiriw Mabayg Buth Pathan Sabadh Goeyginu
141Wara goeyginu sabadhaw goeyginu, Yesu miyaydhin wara parasayalgaw kuyku mabaygoepa, Aygudoepa. Mabaygal danal pathar nuyn, 2kuyk wara kikirilayg sey, nungu gamu bibiriginga.
3Imaypa, Yesu kedha mulaydhin thanamulpa parasayalgoepa a yoewthaw sabiw ngurpay mabaygoepa, “Ngalpan sabinu midh, matha ngoedhagidh kedha mabaygan dhoey nidhan sabathoenu lawnga midh?” 4Kasa kay kedha thana kuniya ya mulayginga. Kalanu nuydh kikiril mabayg madhin. Nuydh dhoeynidhadhin a wayadhin nuyn.
5Kalanu nuy koey mabaygoepa buwayl thoeyadhin a kedha mulaydhin, “Ngithamun nanga garkaz kazi mulupa Arkathiya pudhiz, lawnga ngithamun kow Arkathiya pudhiz, ngitha sobaginga kadaypa manin? Matha kedha goeyga sabadh ngitha ngulayg kadaypa manin A?” 6Thana kasa yagi Asimoeydhin.
Matha Ngoedhagidh Ngi Nginu Geth Apapudhiz Koey Ayngu Lagoenu
7Yesu nuydh iman kedha, mabaygan kasa thanamulngu mina niyaylagal mamayir; nuydh thanamulpa Adha min tidar kedha, 8“Mabaygan nanga ngin thuran niyaypa yoelpay Aygudoepa nanga, ngidh koey mabaygaw niyaylag mayginga. Kedha nanga wara mabayg ngapa ngibiya wagel koey mabayg ngibiya. 9Nuy lagaw thathi ngadh nanga ngin thuran a matha kedha koey mabayg, nuy ngaru ngibepa kedha muliz, ‘Sena mina niyay lag koey mabaygoepa mar.’ Kalanu ngi koey Aziralnga mulupa pagan. 10Mabaygan nanga ngin thuran niyaypa yoelpay Aypa nanga, matha ngoedhagidh kedha ngi kasa matha thanuriz wati niyaylagoenu, kalanu nuy lagaw thathi kay ngibepa muliz, ‘Igalayg, Aya mina lagoepa thami.’ Senabi mina pawa mabaygaw parunu Ayman, a ngin thawmanin.
11“Nga nanga nungungu kadaypa thamiz, nuy ngaru bangal koey Aziralnga mulupa thayan, a mabayg nga nanga nungu geth Apa pudhiz, bangal nuy gimal thawmanine.” 12Nuy senawbi lagaw thathi ngadh na thuraydhin mabaygal Aygudoepa, nuy wara parasayalgaw kuyku mabayg. Kalanu Yesu nubepa buwayl thayadhin kedha, “Ngidh nanga koey Ay Ayman, maygi ngidh thuran matha nginu pasiw mabaygal, matha kedha nginu igalgal, nginu tukuypal, a setha ngaya nanga kedha bokadhzapul mabaygal ngibiya Amadhan. Ngidh na Ayman, thana lak kedha ngin thuran kuniya modhabiya. 13Kedha lawnga, ngidh nanga koey Ay Ayman, thuran Aygig a zagig, muwayzinga a maboegig, a maygum.
14“Kedha na Ayman ngidh woenab ngibepa gasaman. Thana Aygi zagi mabaygal ngin kuniya modhabiya mayginga, matha ngi thanamulpa mina pawa Ayman. Mi thonara nanga Awgadhaw mabaygal lak kaday nithamoene umangu, ngidh bangal mina modhab gasamoene.”
Yesun Adha Min Tidayzi Ya Koey Ay Aymoey Midh Nanga
15Wara Ayngu mabayg Yesuniya pasinu, nuydh nanga karngemidhin Yesu midh na umay, nuy kuniya mulaydhin kedha, “Koey woenabalnga bangal mabayg nga nanga Aydu purathidhe, Awgadhaw koey Ay Aymoeynu, nungu Basalayoenu muynu.”
16Yesun kuniya ya nuydh Adha min tidadhin kedha, “Wara mabayg nuydh buwayl thoeyadhin koey Aypa buth pathaypa. Nuydh mura mabaygal thurimoeydhin senabi buthapathayzimoeypa. 17Thonar nanga gasaman nuydh nungu zagethaw mabayg wayadhin thurayzi mabaygoepa ngapa garwoeydhamoeypa kedha, ‘Ayawal, mura zapul butha pathayzimayl.’
18“Kasa kay kedha thana mura yaynanob butha mathamoeydhin. Wara mabayg kedha, ‘Ngath ngayapa kayn boeradharoepa barpudhan, ngay ngaru sepa imaypa. Ngidh gar ngoena pa wayar.’ 19Wara mabayg kedha, ‘Ngath kayn barpudamoeyn 10 kawal, zagethaw uruyl, ngath ngaru thanamun zagethoepa nuthaypa. Ngidh gar ngoena pa wayar?’ 20Wara mabayg kedha, ‘Ngath matha kayne geth dhoerdhimiz, ngayapa ngapa maboepa lawnga.’
21“Nuy zagethaw mabayg ngapa kuniya tidiz nungu kuyku mabaygoepa, a ngulayg palan nuyn. Kalanu kuyku mabaygaw ngurum koeyza; nuy zagethaw mabaygoepa kedha muliz, ‘Kasa mabaygal ngapa thuri, ngi matha paypa mura goegathaw yabugudiya uzar. Mura koey yabugudiya a moegina yabugudiya uzar. Mabaygal ngaya Aygigal, a roepaylgal, a maygumal, a matha kedha maboegigal; mura thana ngapa thuri ngaw koey Ay Aygudoepa.’
22“Wa, nuydh Ayman kasa kay buthal matha memeyipa. Nuy kuyku mabaygoepa muliz kedha, ‘Kuyku mabayg, ngath Ayman kasa kay buthal matha memayipa.’ 23Nuy kuyku mabayg kuniya mulaydhin kedha, ‘Ngi lak uzar mura yabugudiya, matha kedha mura bupiya moegina yabugudiya uzar, a puridharalnga muli thanamulpa ngapa maypa, kurusipa ngaw lag mura gudiya yoewdhiz. 24Wa, ngay ngithamulpa kedha muliz, mura setha kulay thurayzi mabaygal, thanamulpa mitha poethaypa lawnga, ngaw koey Aygudoepa.’”
Ngi Nanga Yesun Mabayg Nginu Igililnga Ngaru Wara Thonara Koey Mapunga
25Mabaygaw goersar mina koeyza Yesuniya kalmel puzimipa. Nuy thanamulpa Adha min tidan kedha, 26“Mabayg nga nanga nungu ubi ngaybiya puzipa, nungu mam ngaru ngayapa, Apu thathipa lawnga, nungu ipipa kazipa lawnga, a tukuypoepa babathoepa lawnga, a matha kedha nungu geth igililmaypa lawnga. Nungu mam ngayapa ngaru Adhapudhay, lawnga nanga Nuy matha ngoedhagidh lawnga ngayapa niyay kazi tariz.
27“Ngi nanga mapu zagethoengu ubigasin, nginu geth sathawropa oengaypa ngay midh nanga, lawnga ngi koey zageth ngaw niyay kazi Aymiz. 28Matha ngoedhagidh kedha ngidh kulay zapul zoeyzi noeydhemin, wagel kay ngidh zageth Ayman. Matha kedha nginu ubi nanga ngidh kuykuthal lag moeydhan kadaypa, mamu bokadhza sey sithaman kulay, a matha ngoedhagidh senabi lagoepa ngidh nanga mura muwasipa moeydhan.
29“Wara kedha, ngidh kuyk Apal kabuthan a muwasiginga kuyk nginu bokadhza mura sagul palan, mura mabaygal nay iman thana ngin giwn manin kedha, 30‘In nubi mabaygan kuykuthal lag moeydhaypa a muwasipa lawnga.’
31“Wara lak kedha mopakuyk nanga koewbupa mepa, nuy ngaru kulay zoeyzoey noeydhiz a sakar pudhan kedha, nungu koewbu mabaygal matha ngoedhagidh A, wara kuyku koewbu mabaygiya? Nungu mabaygal sike matha ten tawsan a wara koewbu mopakuyku twenti tawsan. 32Nuydh nanga iman kedha nuy matha ngoedhagidh lawnga, nungu mabaygal moenarimayl, nuydh ngaru kulay mabaygal wayamoeyn, wara koewbu mopakuykupa yoewdhemin pawdhoepa.
33“A ngitha lak kedha, mabayg nga nanga mura nungu geth zapul kuniya wayayginga, nuy matha ngoedhagidh lawnga ngaw niyaykazipa. 34Thimedhoegi mabayg nuy ngoedhe wati sol midh nanga. Ngithamun igililmayl ngaru nubi Apagoewanu dhadhal a ngithamun mina zageth matha kedha kapu sol midh, Ay mith palan; ngitha nanga Awgadhaw mina ngurpay oengayginga nanga ngithamun wati igililmayl ngoedhe kedha wati sol midh nanga, nadh nanu mina mith guythwayan. Nan lak kuniya sol Aymayginga, na kasa wati za Amiz.
35“Na matha ngoedhagidh lawnga nginu Apaw lagaw boeradharoepa ukamaypa, a matha kedha na matha ngoedhagidh lawnga puwa woeydhan. Kedha wati Adhabadh ngaru kasa Adha thayan. Wa, ngitha ngaru koey poeypiyam bangal. Ngitha nanga kawralgal, kurusipoegemiw.”,