Yesu Nuydh Wati Mariw Malayzinga Balbay Tidan
51Thana Galilayaw maluya bal pagadhin wara doegam buwadhoepa. Thana gasamoedhin Geroesinaw goegathoepa. 2Yesu nanga pagan butangu nubiya mangiz mabayg, wati mariw malayzinga. Nuy ngapa moeram gudoengu.
3-4Nungu niyay lag sakaynu muynu, moeram gudoenu. Nuy koey thabukiriw mabayg kasa kay kedha mabaygan koey zageth nuyn yatharan. Matha kedha malil urikam matha ngoedhagidh lawnga nuydh lak papudhamoeyn, ngarangu a gethangu. Mabaygoepa matha ngoedhagidh lawnga nubepa kunumaypa. 5Goeyga kubil koey garsar nuy kasa gurguy ulaypa moeram gudiya a padiya; ar pugepa, a nuy nungu geth gamu kulan papathamipa. 6Koey sigapa nuydh Yesun imadhin, wa nuy zilmaydhin a kulun pasayniz nubiya parunu.
7Nuy koey gimiya wal miyaydhin, “Yesu Awgadhaw Kazi, nuy Awgadh koey gimal, ngi mi ubilmaypa ngapa ngayapa? Awgadhaw parunu ngidh kay ngayapa kuth thoerayg!” 8Wagel kay senabi garkaz wal miyaydhin, Yesu kulay kedha mulaydhin, “Wati mari ngi adhapa senabi mabaygoengu.”
9Kalanu Yesu yapu poeybiz nubepa, “Nginu nel nga?” Nuy mabayg kedha nubepa muliz, “Ngaw nel Koeygarsar kuyk koeygarsar wati maril in gamunu muynu.” 10Nuy koeyma thonaralnga Yesulpa yoewdhaydhin kedha, “Maygi adhapa woeyayg wati maril thabi boeradharoengu.”
11Koeygarsar buruman amadhan padaw berowiya ay purthaypu. 12Thana wati maril Yesulpa mulemidhin, “Ngoey kedha burumpa woeyay, ngoey kay setha muy aremipa burumoenu.”
13Wa, nuy kudu madhin a thana wati maril dhanamaydhin mabaygoengu a burumiya uthemidhin. Sena burumaw woelak, thana mura padiya mulupa zilmemidhin, a dudupamoeydhin malunu adhal. Senabi burumaw garsar 2000 mura. 14Thana burumaw danal poethay mabaygal zilmemidhin yangukudu madhin mudhaw lagoepa a matha kedha mura moegina mudhaw loegiya. Mabaygal imaypa ubin memayidhin, na za miza nanga aymaydhin.
15A thana nanga Yesulpa, thana imadhin nuyn mabayg wati marin ngan na siparuy kulay. Thana nuyn dhoemawakulayg imadhin, a nuydh mina wakay thoemamay kuniya gasamadhin. Thana nanga iman thanamun aka koeyza. 16Thana ngaya na imadhin Yesun zageth, thana umamoeyr mabaygoepa kedha, zapul midh nanga aymoeydhin wati mariw moelayzi mabaygoepa, a matha kedha burumal midh na dhanamay.
17Mabaygal Yesulpa mulemidhin kedha, thana bangal wanane senabi koey boeradhar. 18Yesu nuy butanu pathaydhin, nuy kulay nga nanga wati, mariw malayzinga ngapa Yesulpa a yoewdhaydhin kedha, “Ngay kay ngibiya oesipa.”
19Kasa kay kedha Yesu nuyn wadhadhin kedha, “Lawnga, ngi kuniya tidi nginu lagoepa a nginu mabaygoepa, a thana yadu thuremoeyr kedha, kuykulmay mi mina za ngibepa ayman, a mina koerkak badhal pawa.”
20Wa, nuydh mabaygan Yesun wanan, nuy uzaraydhin 10 mudhaw lagoepa, senabi doegam nel Dekapolis. Nuydh thana mura yadu thuraydhin kedha, Yesu nubepa mi matha ngoedhagidh aymadhin. Mura setha ngaya nanga karngemin, thana mina madhu pamemidhin.
Yesu Dhoey Nidhadhin Yoepkaz Kikirilayg
21-22Yesu a nungu niyay kazil, thana nanga kuniya tidemidhin wadhoegam buwadhoengu, mabaygan mina mura garwaydhamoeydhin nubepa. Nuy ka matha woerngu buwadhoenu mer, wara thanamun yoewthaw kuyku mabayg nel Zayroes ngapa sin nubiya parunu kulun pasayniz, 23a mina koeyma yoewdhiz kedha, “Ngaw yoepkaz kaziw gar amadhan um, ngi gar aya ngaybiya asir. Ngidh gar kay kasa nanga geth wanaypa nabiya, nanungu umangu?”
24Kalanu Yesu nubiya asidhin, senawbi mabaygaw garsar lak nubiya wagel asimoeydhin, dhuray mamu zug nanamoeyr Yesuniya. 25Senabi thonara thanamuniya wara yoepkaz puzir. Na senabi yoepkaz moelpalan ipi yapaydhin 12 wathoepa, goeyga kubil koeygarsar. 26Nadh mura doktal imaypa nuthaydhin, a thana mura yaynanob nuthemidhin dhoey nidhaypa nabepa, kasa kay kedha nanu kikir kasa lak mapu oesipu a bokadhza mura guythwayadhin.
27Senabi thonar nadh karngemidhin Yesun adhapudhay dhoey nidhay zageth, na kedha zoengu wagel asidhin Yesuniya. Mabaygiya dhadhiya nadh Yesun koey sodh gethan gasamoedhin. 28Nadh nabiya kedha wakay thamamayidhin, “Ngath kay na nungu koey sodh gethan gasampa, ngay kay mura balbayg oesipa ngoezu nabi kikiringu.” 29Nadh na mi thonara gamu tharadhin Yesun sodh, senabi kikir nanu wath pathadhin, senabi thonara, nadh nanu gamunu muynu gasamoedhin kedha, na balbayg asidhin.
30Senabi thonara Yesu ngulayg asidhin kedha, nungungu woenab a poerapar adhapa miyaydhin; nuy kuniya tharaydhin a mabaygoepa yapu poeybaydhin kedha, “Ngaw sodh, ngadh gethan gamu tharanu?” 31Thana nungu Yesun niyay kazil nubepa kedha, “Ngidh imayginga, ngibepa kakal kedha, in mabayg mina koey garsar zug nanamipa, ngi mipa yapu poeybepa kedha, ngin ngadh gamu tharanu?”
32Kasa kay kedha Yesu ngaru nagay, imaypa kedha mabaygan ngadh nungu sodh gamu tharanu. 33Na yoepkaz na nanunguz ngulayg nanu gamunu kikir muwasidhin. Na matha uzaraydhin Yesulpa apa pudhaydhin nubiya parunu, nanu gamu gar lupar akan. Na mina mura soleginga yadu palgadhin zapul midh paru nanga. 34Kalanu Yesu mulaydhin nabepa kedha, “Ngaw kazi uzar, woenab ngibiya kalmel; ngin kedha zoenguz mina dhoey nidhan, kuyk nginu mina yoepathaman.”
35Nuy nanga yadu umay Zayroesan zoepa woeyay mabaygal ngabunadhin nungu lagoengu kedha yadaygal, “Nginu yoepkaz kazin muwasinu; ngidh nuyn ngurpay mabayg yoelpayg nginu lagoepa, ngidh nungu thonar guythuyayg.” 36Yesu nanga thanamun yangu wakay gasamoedhin, nuy kedha mulaydhin yoewthaw kuyku mabaygoepa, “Akan maygi, thanamulpa koerngayg, lak akag kasa mina yoepathamar.” 37Nuydh senabi mabaygaw garsar mura wadhaydhin, nuydh yoelpamoeydhin nubiya kalmel matha Petheru, Zemes, a nungu tukuyap Yoewane.
38Thana nanga amadhan aymoeydhin yoewthaw kuyku mabaygaw lagoepa nanga, Yesu imadhin kedha mabaygan may mar a thana mina koey gimiya may mar. 39Nuy nanga muy yoewthaydhin nuy kedha mulaydhin thanamulpa, “Ngitha mingu mina koey gimiya may maypa, ina moegina kaz um mayginga, na kasa uthuy yuwipa.” 40Thana kasa giw mar nubepa. Kalanu nuydh thana sizi lagoengu mura adhapa wayaydhin muyngu. Nubiya si matha apu thathi a nungu pasi puziw mabaygal; thana muya uthemidhin na moegina yoepkaz ngalaga nanga yuwir.
41Nuy nanu gethanu nidhaydhin a thanamudh kedha mulaydhin nabepa, “Talitha kum.” (Aykap muynu kedha, “Moegina yoepkaz, kaday tari, ngay ngibepa kedha muliz.”) 42Na moegina yoepkaz mina senabi thonara kaday tharaydhin, a mab uzaraydhin; na matha tweylob woethaylayg. Thana sethabi thonara mina koeyma madhu pamemidhin.
43Nuy thanamulpa mina koey ridha ya woedhan aymoeydhin, si muynu kedha, “Wara bangal kobegadh mabaygoepa mulayg, ngath miza nanga aymoenu.” Nuy thanamulpa wara kedha mulaydhin, “Ngitha nan aydu poeybaw.”,