Matha Ngoedhagidh Midh Kikiril Mabayg Balbay Tidan Sabadh Goeyginu
31Wara na Sabadh nanga Yesu a nungu kalmel niyay kazil thana ladhudhin yoewthoepa. Wara mabayg si mepa nungu geth muwayzinga. 2Wara Parasayalgan thana ngoelkay ayman, matha nuyn Yesu danal pathar gegeyadhoepa kedha; na kay midh, nuydh zageth ayimpa saboedhoenu, dhoey nidhaypa senabi mabayg sabathoenu.
3Wa, Yesu thanamulngu ngulayg. Nuy muwayzi mabaygoepa muliz kedha, “Sew parunu kaday tari, mura mabaygoepa imaypa.” 4Nuy Yesu mulaydhin thanamulpa kedha, “Matha ngoedhagidh midh, sabadhoenu ayimpa mina za lawnga wati za kedha, igil palan mabayg lawnga mathaman?” Thana kasa yagi asimoeyn. 5Nuy thanamulpa gegeyadh nagiz, nungu koerkak badh thanamulpa, thana koey ridha kuykul. Nuy kuniya buwayl thayiz mabaygoepa kedha, “Nginu geth adhapa luwayar.” Wa, nuydh luwayadhin, na geth mina balbayg asin.
6Thana parasayalgal sizi ladhudhin uwan, Erodhan mabaygoepa, kaliya tharaydhin Yesun, “Ngalpa bangal nuyn mathamoeyne.”
Koeygarsar Mabaygal Wagel Asimoeyn Yesuniya
7Yesu nuy adhapa uzaraydhin a Galilayaw malupa. Kalmel nubiya koey goersar sew Galilayaw goegathaw mabaygal asimoeydhin. 8Koeysigaw lagaw mabaygan na karngemidhin nuy midh na merparuy, thana mura ngapa nubepa ladhudhin Yudhayangu, Yoerusalemoengu, Idumayangu, a matha kedha Yoeridhaw koesaw wara doegam buwadhoengu, koeysigaw goegathoengu, a matha kedha Thayar a Saydon. 9-10Nuydh koeygarsar mabaygal dhoey nidhamoeydhin kedha zoengu mabayg koeygarsar kalmel kikirilgal thana amadhan pathamar nubepa gethan nidhaypa. Nuy buthagasir, zagethoepa a nuy niyay kazipa muliz kedha, moegina gul nubepa buth pathan.
11Dhuray rimarim mabaygal wati mariw malayzimayl thana na midh thonar Yesun iman, thana wal tiduman kedha, “Ngi Awgadhaw Kazi.” 12Nuy thanamulpa koey dharadh mulaydhin kedha, “Maygi, wara mabaygoepa mulayg, Ngay nga nanga.”
Yesun Tweylob Adhapa Thamayzi Mabaygal Aposoelal, Nungu Yangu Ngurpay Mabaygal
13Wara thonar Yesu uzaraydhin padaw kibupa, kalanu nuy nungu ubilgal mabaygal thuraydhin, a thana asimoeydhin nubiya. 14Nuydh tweylob adhapa thamayidhin kupay poeybadhin aposoelal aymoeydhin, thanamulpa nubiya kalmel oesipa; bangal wara goeyginu thana wayaydhin adhapa, nungu zagethoepa oengaypa maw siparuy a 15kupay poeybadhin thanamulpa wati maripa adhapa woeyaypa rimarim mabaygoengu.
16Itha thana tweylob apostolaw adhapa thamayzi mabaygaw nelay kedha, Simona, (Yesu nubepa wara nel poeybadhin Petheru.) 17Zemes a nungu tukuyap Yoewane. Palay Zebadin Kazi. (Nuydh thanamulpa kedha nel poeybadhin, Gigi Kazi. Thanamun yangukudu kedha Bowanoerzi.) 18A wara thanamun nelay itha kedha, Andhoeru, Pilip, Bartholemiw, Mathayu, a wara Zemes Alpiyasan kazi, a Thadiyus, a Wara Simona (Thana nuyn kedha thoeraypu koey buway mabayg.) 19A wara Yudha nuy Keriyothoelayg, ngadh na Yesun kalanu guda aradhin.
Yesun Kupay Midh a Sathanan Kupay Midh
20Yesu nuy lagoenu mangaydhin nanga mabaygan lak mina koey garsar garwoeydhamoeydhin. Thana buthag asimoeydhin sew lagaw mabaygal aypa aygudoepa. 21Nungu buway mabaygan nanga kedha karngemidhin, nuydh zageth kedha oengaypa, thana ladhudhin nubepa adhapa gethiya yoelpaypa lagoepa. Thanamun wakay thoemay kedha, “In nuydh kuyk guythuyaypa.”
22Dhuray sabiw ngurpay mabaygal ngaya nanga Yoerusalemoengu, thana lagoepa ladhudhin Yesulpa, a kedha mulemidhin, “Sena nuy Sathanan mariw gethiya yoelpayzinga, matha kedha nuyn Bilzibaban gethiya yoelpan; nuydh kedha zoengu ngulayg wati mariw adhapa maythayle; nuydh senawbi kupay gasamoedhin thanamun wati pawa mopakuykoengu.”
23Kalanu Yesu thana thuraydhin a mulaydhin kedha, “In kay ngath ngithamulpa adhamintidaypa; midh kay paru Sathana, Sathanan adhapa maypa mabaygoengu? 24Midh kay paru basalaya nanu geth dhadhiya mepa. Kedha nanga, senabi basalayapa kuykuthalnga kaday thoeraypa lawnga. 25Buway lak kedha, nanu geth kay nanga dhadhiya mepa, nabepa kuykuthalnga kaday tharepa lawnga.
26“Sathanan nanga lak kedha ngoedhal za ayman nanga, nubepa lak kedha kuykuthalnga kaday tharepa lawnga. Ngitha nanga ngayapa kedha, ngay Sathanan mariw malayzinga, wa midh kay paru ngath Sathanan mari adhapa maypa mabaygoengu? Kedha nay na ngaru Sathanan kuth. 27Sathana ngoedhe koey bibiril mabayg, ngibepa kasa matha nungu loegiya muya uthuypa lawnga. Nginu nanga koey magawl mabaygaw lagoengu zapa gasamoeypa ubi, ngidh ngaru kulay nuyn urukoemin yatharpa. Wagel kay ngidh nginu ubilnga ayman.
28“Ngay ngithamulpa mina kay mina ya muliz kedha, ngitha bangal ngaru koey poeypiyam. Awgadhan ngulayg bangal mura wati pawal bangal gud woeyamoeyne matha kedha mabaygaw Awgadhoepa kuniya ngoelkay yangukudul, Awgadhan ngulayg adhapa gud woeyamoeyn. 29Kasa kay kedha mabaygan ngaya nanga Maygi Maripa ngoelkay yangukuduya ya umamoeypa, thanamun senawbi gegeyadh bangal ngaru thanamuniya kuthaginga kuykuginga. Thanamun kedha gegeyadh ngaru gud woeyayginga.” 30Nuy kedha zoenguz kedha mulaydhin thanamulpa kulay, minguz kedha thana kedha mulamoeydhin, nubiya muynu Sathanan mari.
Yesun Mina Gamu Buway Ngaya Nanga
31Senabi thonara nanga Yesun apu a tukuypal thana adhal mangemidhin, a ya madhin nubepa adhapa thuraypa, yapa yapupoeybaypa. 32Nubepa na senabi yangukudu mar nanga, sinubi thonara mabayg nubiya mina koey goesar nuyn zug nanamipa. Thana nubepa kedha mulemidhin, “Nginu apu a tukuypal thana si adhal ngin lumaypa.” 33Nuy kedha mulaydhin thanamulpa kuniya, “Mabaygal ngaya ngaw apu a tukuypal?”
34Kalanu nuy mabaygiya mura gurguy nagaydhin nubiya ngaya nanga nir; nuy kedha, “Ngaw apu a tukuypal itha! 35Mabaygan ngaya nanga Awgadhaw ubilnga ayimpa, thana sethabi mabaygal, ngaw apu, ngaw babath, a ngaw tukuyap.”