Koey Dhiwalnga Yoerusalemiya Muya Uthaydhin
111Yesu a mura mabaygal Yoerusalemoepa amadhan aymoeydhin, thana gasamoedhin ukasar moegina goegath nel Bethpayz a Bethoeni. Thana ngapa Olibaw padoepa amadhan. Yesu kulay wayamoedhin ukasar nungu niyay kazi. 2Palamun zageth yadu palgadhin kedha, “Sepa uzarmoeriw mudhaw lag sey parunu, ngipel kay na mangempa ngipel balbayginga imane asinaw kazi, yatharayzinga. Mabayg kulay niyayginga, senabi asinaw kazi. Gud wayaw ngapa ngayapa mariw koepa.
3“Mabayg kay na ngipelpa yapu poeybay kedha, ‘Ngipel mipa manin?’ Ngipel kay kedha mulemoeriw nubepa, ‘Kuykulnga ubin mepa, a lak kay ngapa kuniya maypa sobaginga.’” 4Palay uzarman a iman asinaw kazi yabugudoenu, dhoerdhimoeyzinga lagaw pasaw gudoepa. Palay gud idhun nanga, 5dhuray mabaygal pasinu palamulpa kedha mulemin, “Ngipel mipa kedha ayman, gud wayan asinaw kazi?” 6Palamun kuniya ya kedha, Yesu palamulpa midh na mulaydhin, mabaygan palay kasa guythuyamin. 7Palay nan asinaw kazi Yesulpa manin a thanamun koey sodhal gimiya gud palimoeydhin asinaw kaziya, a Yesu thanuraydhin gimal.
8Koey garsar mabaygal thanamun koey sodhal gud palemoeydhin yabugudiya, a wara mabaygal puy thamal tidamoeyr boeradharoengu, a yabugudiya idimar. 9Koey garsar mabaygal nubiya parunu a koeygarsar nubiya kaliya, kedha wal tidumar kuykayman,
“Ngoey Awgadh koeyma thawmanin, woenab ngi ngapa Kuykulnga.
Awgadhaw nel adhapudhay koey gimal,
a ngi ngapa nungu kupaynu muynu, a nungu nel.
10Awgadh koeyma thawmaypa,
a woenab ngibepa nga ngapa gudaz puydhaypa
ngalpan thathiw Dhawithan basalaya,
a thawmanin Awgadh.
Senabi basalaya ngaru koey ridhanga.”
11Yesu nuy muy yuthiz Yoerusalemiya, a nuy muy yoewthaydhin koey yoewthanu, a imaydhin mura nanu zapul muynu. Nuy goeyga koey pawpa, nuy a nungu niyay kazil lak adhapa ladhudhin senabi moegina mudhaw lagoepa, Bethoeni.
Yesu Wati Kuth Madhin Aypuy Koewsapa, Dhani
12Wara goeyga thana kuniya tidemidhin Bethoeningu a Yesun gamu ayginga 13nuydh wara aypuy imadhin puy nel dhani, koey maludh nisalnga. Nuy imaypa sipa uzaraydhin kedha, nuy aydenga. Nuy na ngapa nuydh iman kedha, matha nisal ayginga. Nungu ayngu thonara lawnga. 14Nuy Yesu mulaydhin dhaniw puypa kedha, “Lak war mabaygoepa nginungu purthaypa lawnga.” Thana niyay kazin nungu ya karngemin.
15Thana nanga mangemidhin Yoerusalemoenu, Yesu uzaraydhin koey yoewthoepa. Nuy koeyma ya poeybaydhin a adhapa wayaydhin setha mabaygal ngaya nanga zapul yoewdhamoeyr yoewthanu muynu. Bokadhzoengu sakariya thoeyay mabagaw biraygil kuykul idimoedhin. A setha ngaya nanga moeginga uruyl yoewdhamoeyr nuydh thanamun apa niyay lagal lak kuykul idimoedhin. 16A nuy lak ubig asidhin mabaygoengu yoewthaw boeradhariya thawpay pasi luman adhaw zapun gurepa muya yoewthaw boeradhariya.
17Kalanu nungu ngurpay ya mabaygoepa kedha, “Awgadhaw yangukudu minar poelayzinga kedha, ‘Ngaw koey lag, kedha thoeraypu ngaw Thoeythu Poegay Lag, mura nubi apaw goewaw mabaygoepa.’ Kasa kay kedha ngitha ngoedhe puru mabaygal ngoelkay modhabilmayl zapul yoewdhamoeypa maygi lagoenu muynu!” 18Thana koey misnarel a sabiw ngurpay mabaygal karngemin senabi ya, zapul midh paru nanga, thana lak thabukir gasaman, luman wara doegam Yesulpa mathamoeypa. Thana iman kedha mura mabaygal madhu pamemidhin a asimoeydhin nubiya, thana kedha zoenguz akan nungungu. 19Kut dhib asidhin nanga Yesu a nungu niyay kazil, thana senabi goegath wanadhin.
Yesu Thonara Tidan Ya Dhaniw Puypa
20Mina bathaynga wara goeyginu thana tadir yabugudiya, thana iman senawbi dhaniw puy Yesu kulay kuth madhin yadu nubepa, nuy mura umanga sipil koelmel. 21Petheru nuy wakay thayadhin Yesu midh na mulaydhin, a nubepa kedha mulaydhin, “Ngurpay mabayg, nagi senawbi aypuy na umanga, senaw mi dhaniw puy ngidh kuth tharadhin.”
22Yesu kuniya mulaydhin thanamulpa, “Kedha yakanurayg, ngitha nanga Awgadh mina yoepathaman, 23ngithamulpa zagethoeginga kedha ngidh koey pad mura adhathayan malupa. Ngidh na mina yoepathaman nginu ngoenakapoenu nanga ngoelkay yoepathamayginga, ngidh gasaman mi zoepa nanga ngi yoewdhepa. 24In nabi za kedha, ngay ngithamulpa muliz, ngitha nanga thoeythu pagemin a yoewdhemin ngithamun ubilmaypa, ngidh ngaru mina yoepathaman Awgadh kedha, senabi za ngidh gasaman muynu ngibiya. Wa, kedha nanga ngibepa Awgadhan poeyban, ngi mi ubilmaypa nanga umepa. 25A wara kedha ngithamun thoeythu poegaynu nanga, nginu ngoenakap gegeyadh, kuyk wara mabayg gegeyadh ayman ngibepa, ngidh ngaru guythuyan senabi gegeyadh, mabaygoepa; ngidh na kedha wanan nanga nginu daparaw Thathin guythuyan mura gegeyadh nginu.’”*Dhuray kulkubaw minar peolayzimayl, thana wara basalmayl kedha 26 Ngidh nanga gud woeyayginga senabi wara mabaygaw gegeyadh, nginu Thathin lak kedha ngibepa nginu gegeyadhal gud woeyayginga.
Yesu Nuydh Nungu Kupay Ngalagaz Gasaman Zagethoepa
27Yesu a nungu niyaykazil lak kuniya tidemidhin Yoerusalemoepa. Nuy nanga koey yoewthiya woelmay, thana koey misnarel, a sabiw ngurpay mabaygal, a thanamun koey mabaygal ngapa nubepa 28a kedha mulemin, “Muli ngoeymulpa, ngidh ngalagaz kupay gasamoengu nabi zagethoepa, a ngibepa matha ngoedhagidh ngadh mangu kedha aymoeypa?”
29Yesu kuniya mulaydhin thanamulpa, “Wa, ngayapa lak kedha matha urapun yapu poeybay ngithamulpa. Ngitha kay ngayapa mulemiw, wa ngayapa lak kedha ngithamulpa mulaypa kedha, ngaw kupay ngalagaz. 30Sena nungu Yoewanen Papthayso, nungu Papthayso zageth, na ngalagaz ngapa; Yoewanen kupay Awgadhoengu lawnga mabaygoengu?”
31Thana kidhakidhan ya umamoeyr thanamuniya muynu, “Ngalpa kay midh mulemipa. Ngalpa kay na kedha mulemipa, Yoewane nungu kupay Awgadhoengu ngapa, nuy kay kedha mulepa, ‘Ngitha minguz Yoewanelpa mina yoepathamayginga?’ 32Wara kedha, ngalpa kedha umamoeypa nanga, Yoewanen kupay Awgadhoengu lawnga, na kasa mabaygoengu, ngoeymun aka kedha zoengu, wara mabaygoengu. Mabaygaw mura wakay thoemamay kedha, nuy Yoewane Peropetha.”
33Kurusipa thana kedha mulemidhin nubepa, “Ngoey koerawaygal.”
Yesu thanamulpa kuniya mulaydhin, “Ngitha yagigal, nungu kupay midh paru? Wa, ngay lak kedha ngath ngaw kupay seysithamayginga ngithamulpa nubi zagethoepa.”,

*11:25: Dhuray kulkubaw minar peolayzimayl, thana wara basalmayl kedha 26 Ngidh nanga gud woeyayginga senabi wara mabaygaw gegeyadh, nginu Thathin lak kedha ngibepa nginu gegeyadhal gud woeyayginga.