Yesun Romaniw Kuyku Mabaygoepa Madhin
271Mina bathaynga nanga thanamun kuyku misnarel a koey mabaygal lak garwoeydhamoedhin thanamun wati buwayl thoeyaypa aymoeypa, Yesulpa umamathamaypa. 2Thana Yesun kunumoedhin, kalanu Pilatholpa angadhin. Nuy Pilatho Romaniw kuyku mabayg thanamuniya kalmel.
Yudha Nungu Geth Woeth Yatharaydhin
3Yudha nanga imadhin kedha, thana Yesun umamathamaypa madhin, nungu koerkak badh mina koeyza nuydh Yesun guda aradhin thanamulpa. Nuydh geth woeydhadhin, a sethabi thoerti silba bokadhzapul nuydh kuniya agaydhin thanamulpa kuyku misnarepa a wara koey mabaygoepa. 4Nuy kedha, “Ngath gegeyadh aymoengu; senawbi mabayg ngath ngithamulpa madhin, nuydh za gegeyadh aymayginga.” Thana kedha, “Sena nginu mapu, ngoeymun mapu lawnga.” 5Yudha nuydh sethabi silba bokadhzapul kasa thoeyamoeydhin koey yoewthoepa muypa, kalanu adhapadhadhin, nungu geth puynu gimal woeth yatharaydhin. 6Thana kuyku misnarel garwoeydhamoeydhin sethabi thoerti silba bokadhzapul; thana kidhakidhan kedha, “Ngalpan sabinu nubi bokadhzapul matha ngoedhagidh lawnga yoewthaw bokadhzapa, kuyk ina mabaygaw kulkapa modhabiya manin.”
7-8Kalanu thana moegina boeradhar barpudhaydhin sethabi bokadhzapun, a nan boeradhar kalanu azaz mabaygaw moerama thoeyay lag aymoeydhin. Senabi boeradhar na kulay besiniw zagethaw mabaygaw lag; kalanu nan kedha tharadhin, kulkaw boeradhar. 9Ina kay paypa kulay peropethaw Erimayan ya kuykunidhan kedha, “Thana madhin thoerti silba bokadhzapul, sena Isoereylaw buway mabaygaw modhab nubepa madhin. 10Kalanu nan bokadhza boeradharoepa yoewdhaypa. Thana besiniw zagethaw mabaygaw boeradhar barpudhadhin, Awgadhaw yangukudu midh nanga ngayapa.”
Romaniw Kuyku Mabaygan Yesun Zeyzi Noeydhaydhin
11Thana Yesun madhin Romaniw kuyku mabaygaw lagapa. Nuydh kuyku mabaygan nuyn thuradhin yapu poeybadhin kedha, “Ngi mina Yoewdhayalgaw kuykulnga a?”
Yesu kuniya kedha mulaydhin, “Wa, nginu yangukudu moegina balbayginga.” 12Thana mura kuyku misnarel a koey mabaygal kasa mulamoeyr Yesun Romaniw kuyku mabaygoepa, kasa kay kedha nuy Yesu kasa yagig.
13Pilatho kedha nubepa, “Ngi midh paru kuniya ya mulayginga koepa thanamulpa?” 14Kasa kedha Yesu ngaru kuniya ya mulayginga. Nuy Romaniw kuyku mabayg dan katamaydhin.
Thana Yesulpa Kuth Tharan
15Wara thanamun pawa kedha, mura wathanu nanga mura kaludhay ayngu thonara nanga, nuy Romaniw Kuyku Mabaygan ngulayg urapun kunumayzi mabayg gudwayan. Mura mabaygal garwoeydhamaydhin; thanamun ubi kunumayzi mabayg thuraypa Romaniw kuyku mabaygoepa gud woeyaypa.
16Senawbi wathanu wara mabayg nel Yesu Barabas sey kunumay lagoenu a mura mabaygal nungungu ngulaygal. 17Koeygarsar mabaygal garwoeydhamaydhin nanga, nuy Pilatho yapupoeybiz kedha, thanamulpa, “Ngithamun mi mabaygoepa ubi ngath ngithamulpa kay gud woeyaypa, Yesun nuyn kedha tharan Keriso, lawnga nuy wara Yesu, Yesu Barabas.” 18Nuy Pilatho ngulayg kedha, thana yoewthaw koey mabaygan kasa uwanu memayidhin, thana kedha zoenguz Yesun kotapa madhin.
19Pilatho nanga kotanu nir, nungu ipiw yangukudu mangiz. Nanu yangukudu kedha, “Ngi koey poeypiyam senabi mabaygoengu, nuydh za aymayginga, ngoena pikin thayan bongel, koey akalnga, ngidh nuyn mathamayg; nuydh wara za gegeyadh aymayginga.” 20Thana kuyku misnarel a koey mabaygal ya umamoeyr thanamun wagel parul kedha, “Kapu za kedha, ngitha Barabasoelpa mulemiw gud woeyaypa a Yesun kay mathamaypa mariw.” 21Pilatho mura mabaygoepa yapu poeybiz kedha, “Ngithamun ubi midh, ngath kay mabayg ngithamulpa gud woeyaypa palbi mabaygoengu?” Thana mura kidhakidhan kedha, “Barabas.”
22Nuy Pilatho thanamulpa kedha muliz kuniya, “Ngath kay miza ayimpa Yesulpa, nuy kedha tharan, Keriso?” Thana mura kuniya kedha mulemin, “Nuyn sathawrawo puydhaw.” 23Pilatho thanamulpa kedha muliz, “Nungu gegeyadh midh, ngath kay mingu nuyn sathawrawo puydhaypa?” Thana koezi lak gima gudiya wal memayir kedha, “Nuyn sathawrawo puydhaw.”
24Pilatho nuydh iman kedha, thana nubepa kurusipagayginga, nuy moegina akan mer koey silamayngu kuykaymayle. Nuydh nguki gasaman, nungu geth garwalagiz thanamuniya parunu. Nuy kedha mulaydhin thanamulpa, “Nag, in matha ngithamuniya mepa, ngay lawnga.” 25Thana mura kuniya mulemin kedha, “Wa, ngoeymulpa matha ngoedhagidh nuyn mathaman, nuy nanga sike mina mabayg, ngoey a ngoeymun kazin bangal wati za gasamoene Awgadhoengu.”
26Kalanu Pilatho thanamulpa gudwayan Barabasan, kasa kay kedha nuydh Yesun nungu koewbu mabaygoepa gud aradhin poelngipa. nuyn sathawrawo puydhaypa madhin.
Koewbu Mabaygan Yesun Giwn Soelmadhin
27Palngi kalanu thana koewbu mabaygan nuyn yoelpan thanamun niyaylagoepa, koey rumoepa. Thana mura garwoeydhamoeyr, nubepa giwn soelmaypa. 28Thana nuyn rugan thudhan a kulka gamul koey sodh wanan nubiya. Thanamun pawa kedha sethabi goeyginu, adhapudhay kuykulnga ngulayg kulka gamul koey rugan ubamiz.
29Thana nubepa patal puyngu ngoelkay korone aymoedhin a nungu kuykunu wanadhin gimal. Nubepa puy madhin getha doegam gethoepa, kasa ngoelkay, kuykulmay mabayg midh nanga. Thana apapudhemir nubiya parunu, giwn soelmar a kedha umamoeyr nubepa, “Nginu igililnga ngaru koey kuykuthalnga, ngi koey woenabalnga, ngi Yoewdhayalgaw kuykulnga.”
30Thana nuyn Mosen tidar, a nungu boegi madhin, nubiya kuykunu wariman.
Sathawrawpa Puydhadhin Yesun
31Thanamun nanga giwn soelmay muwasin, thana kalanu kulka gamul rugal thudhan, nungu rugal kuniya ubaman. Kalanu thana adhapa yoelpadhin nuyn, sathawrawpa puydhaypa nuyn. 32Yabugudoenu dhadhal thana Sayrinaw mabayg iman, nungu nel Simona. Thana nuyn gasamadhin, Yesulpa ibupuydhaypa sathawrawpa maypa.
33Thana ngabunadhin lag nel Golgotha, ngalpadh kedha, kuyku ridhaw lag. 34Thana nubepa madhin, umal nguki a gal kidhthoeyayzinga. Senabi gal mabaygaw gamu uthuy yoewnay za. Nuydh kasa mith pathan senabi za, nuydh woeniginga. 35Thana nuyn sathawrawnu puydhadhin, nungu rugal thana thanamulpa mamayidhin, days thayar dhadhiya dhadh mamayir nungu rugal thanamuniya.
36Kalanu thana kasa nuyn milal nagemir. 37Thana yangukudu paladhin, nubiya gimal puydhadhin, “In Yesu, Yoewdhayalgaw kuykulnga.” Sena mi yangukudu nanga thana yoewthaw koey mabaygal nuyn mulamoedhin.
38Wara ukasar mabayg, palay lak sathawrawnu puydhamoedhin wadhwadhgam Yesuniya. Palbi thabukiri mabayg, matha kedha puru mabayg midh nanga.
39Mabaygal ngaya sike pasiya tadir, thana kasa kuyk woerimoeyr, kedha umamoeyr. 40“Ngidh ngulayg idiman Awgadhaw yoewth a lak moeydhan thoeri goeygi kaliya a? Ngi Awgadhaw Kazi, koey poeraparal mabayg a? Midh paru ngi nginungu balbay tidayginga a? Mingu ngi mulupa poegayginga soeyzi sathawrawngu?” 41Thana kuyku misnarel a yoewthaw sabiw ngurpay mabaygal lak kedha nuyn giwn soelmar. 42“Nuydh wara mabaygal balbayg palimoeyn, kasa kay kedha nuy nungu geth ibupuydhayginga. Nuy kedha mulaydhin, nuy Yoewdhayalgaw Kuykulnga, nuy kay nanga nungu geth mulupa poegaypa, wa ngoey nubepa mina yoepathaman. 43Nuy kedha, nuy Awgadhaw Kapu Akasizi Kazi, ngalpa kay imaypa, Awgadhan kay midh nuyn ibupuydhaypa.” 44Sepal sathawrawnu wadhwadhgam poeydhayzi mabaygan lak kedha nuyn giwn soelmar.
Yesun Kuth
45Dhadha goeyga nanga aymiz, koey inur pudhaydhin matha kedha kubil midh nanga mura doegamuya. 46Thoeri awalnga inur pudhaydhin; kalanu Yesu koey gimiya wal miyaydhin kedha, “Eli, Eli lema sabakthani?” Muynu kedha, “Ngaw Awgadh, ngaw Awgadh, ngidh mingu ngoena kasa wananu?”
47Dhuray mabaygal si pasinu sir, thana karngemin. Thana kedha, “Nuy peropeth Elayzapa wal mepa sike.” 48Urapun mabaygan thanamulngu sobaginga zilamiz sathawrawpa, spanz gasaman, kalanu sisaberal umal ngukinu thardhan; kalanu puy kopin pagan, Yesulpa yudhan nubepa woenipa. 49Kasa kedha dhuray wara mabaygal kedha, “Thuma, mamu imaypa peropeth Elayza lawnga soeyzi ngapa.” 50Senawbi thonara Yesu lak koey gimiya wal miyaydhin, nungu moeygapa guban.
51Balbayginga senawbi thonara, koey yoewthanu thanamun wolaw koey dhoemawaku nanu geth pakadamoeydhin gimanoekaz mulupa. Boeradhar koeyma garguy miyaydhin, kulal papoelamoeydhin; 52koeygarsar kulba uma mabaygaw surumal gud pudhemidhin. Dhuray Awgadhaw mabaygal, setha ngaya nanga kulba umamayl, lak kaday nithamoedhin moeramoengu.
53Kalanu bangal, Yesun kaday thoeray kalanu, setha kaday thoerayzi mabaygal bangal Yoerusalemiya muy aremine, Awgadhaw maygi goegathiya. Koeyma mabaygan thana imedhe. 54Nuy koewbu kuyku mabayg a setha ngaya nanga nubiya kalmel, thana nanga imadhin kedha boeradhar koeyma garguy miyaydhin, a mura setha zapul nanga aymoeydhin Yesu midh thonara um miyaydhin, thanamun aka mina koeyza. Thana umamoeyr kedha, “Wa nuy mina Awgadhaw Kazi.”
55Dhuray yoepkazil thana Galilayoengu ngapa Yesuniya asimoeydhin, thana lak kedha nungu mabaygal. Sathawrawpa thana moegina sigaz nagemir. Thana ibupuydhaypu nuyn. 56Dhuray thanamuniya nelay kedha, wara goegathaw mabayg nel Mariya Magdaloengu, wara Mariya, Zemesan apu, a wara Zemesan a Yoewsepan apu. Thana mura Yesun yawayar.
Yesun Moeramathayadhin
57Pawpa kutapa nanga, wara koey mabayg mangiz, Aramathiyalayg nungu nel Yusepa; nuy koey bokadhzapul mabayg. Nuy lak kedha Yesulpa kurusipagepa. 58Nuy Yoewsepa Romaniw kuyku mabaygoepa, Pilatholpa yapupoeybiz kedha, “Ngidh gar ngayapa Yesun gamu mulupa maypa?” Pilatho nungu koewbu mabaygoepa muliz kedha, “Yesun gamu nubepa mariw.”
59Kalanu Yoewsepa nungu Yesun gamu kayn pepe dhoemawakun nuran. 60Nungu Yoewsepan geth moeram meparu amadhan, kulanu anarayzinga. Nuydh Yoewsepa, Yesun gamu sin muynu aradhin wagel koey kula adhaz koezi wanadhin gud mathamoedhin, kalanu nuy uzaraydhin. 61Sepalbi yoepkaz, Mariya Magdaloengu a wara Mariya, palay si adhal memamar.
Koewbu Mabaygan Yesun Moeram Danal Pathadhin
62Senawbi za aymaydhin prayde; wara goeyga nanga thana yoewthaw koey mabaygal Romaniw kuyku mabaygiya mangemidhin kedha. 63“Kuyku Mabayg, ngoeymun ngoenanumaypa kedha, senawbi ngoelkay mabayg nga nanga sathawrawnu puydhangu, nuy kedha ngoelkay ya mulaydhin, ‘Ngay bangal umangu; thoeri goeygiw kaliya ngoena bangal lak kaday tharane umangu.’ 64Ngidh gar nginu koewbu mabaygal woeyamoeyr, thoeri goeygipa nungu moerampa, mina danalpoethaypa; na thanamulpa, nungu niyay kazingu nungungu purunu woerdhayle. Thana niyay kazingu mabaygoengu karum poelayle, ‘Nungu gamu guythuyan, nuy ngaru kaday thariz.’ Senabi ngoelkay nay adhapudhay nungu kulay ngoelkay midh nanga.”
65Nuy Romaniw kuyku mabayg kuniya kedha mulaydhin thanamulpa, “Wa, koewbu mabaygal mamayiw, nungu moerampa mina danalpoethaypa.” 66Kalanu thana ladhudhin, moeramaw gud mathamay kula pagasamadhin a thanamun geth za poelayzinga aymoedhin, kula ngalaga nanga pagasamadhin, wara mabaygoengu kulangu adhapa maythayle. Kalanu sethabi koewbu mabaygal wanamoeydhin danalpoethaypa.