Yoewsepan May Koeyza Nungu Thathipa
501Nuydh nanga Yoewsepa imadhin kedha Yakubu muwasin nuy kasa mura nungu thathiya gimiya maylmayl pudhaydhin paruya, nuyn gud thapamar. 2Kalanu Yoewsepa nungu zagithaw moebaygoepa mulaydhin, nungu thathiw gamupa danalpoethaypa. 3Poti goeygoeylnga thana danalpathadhin. Aykupithulgan sebenty goeygoeypa koerkak badh gasamoedhin. 4Koerkak boedhaw thonar nanga muwasidhin Yoewsepa kalanu Peron zagethaw mabaygoepa mulaydhin, “Ngay gar yoewdhiz ngithamuniya in nubi yangukudupa Perolpa mariw. 5Ngaw thathiw nanga um amadhan aymaydhin nuydh ngoena mina yoepa mulaypa madhin, ngath bangal nuyn Kanananu moerama thayane nuydh ngalaga nanga boeradhar barpudoedhin. Ngaw gar yoewdhiz ngoena pawayaw ngaw thathiw gamupa moeramar thoeyaypa, a ngay bal kalanu lak boey kuniya.”
6Nuy Pero kedha mulaydhin, “Wa uzar a nginu thathiw gamu moerama thayar, ngi midh nanga umepa.” 7Kalanu gar nuydh Yoewsepa nungu thathi moerama thayadhin mura Aykupithu kuyku moebaygal asimoeydhin Yoewsepaniya. 8Yoewsepan mabaygal a nungu tukuypal a mura nungu thathiw kaziw kazil asimoeydhin. Matha moegina koezil yawaygal, a tetel uruyl kawal a mamuyl kuniya yawaygal Goseninu. 9Mabaygal kedha osanu, a sigangaraw mabaw zoepunu memaydhin, Yoewsepaniya mabayg mina kay garsar senawbi thonara.
10Thana nanga ngapa si na mangemidhin kunaw zagethaw lag, Athadhoenu sager doegamunu, Yuridhaw Koesanu, thana mina gegeyadh koerkak badh gasamoedhin, a mina kay gima may mar. Kalanu Yoewsepa si maywoedhay ay aymoedhin seben goeygoeylnga. 11Thana nanga Kananaw moebaygan imadhin kedha Aykupithulgan maywoedhay ay aymar Athadhoenu, thana kedha mulemidhin. “Sena thana mina kay ridha maywoedhay ay aympa!” Nan senawbi lag kedha zoenguz kedha tharadhin Abel Mizraym.
12Yakubun kazin kalanu thanamun thathiw yawoedhayzimaya thayamidhin. 13Thana nungu gamu madhin Kananapa a kulaw sakaynu muynu wanadhin Makpelanu sager doegamunu Mamrenu, Abrama mi boeradhar na Ebronalngu barpudoedhin, Ithalayg. 14Thana nanga Yakubun gamu moerama thayadhin kalanu thana mina mura Yoewsepaniya kuniya asimoeydhin Aykupithupa a Yoewsepan tukuypal, a setha ngaya nanga asimoeydhin.
Yoewsepa Nungu Tukuypal Lak Mina Ridha Yadu Mamaydhin
15Thanamun thathiw umaw kaliya nanga, thana Yoewsepan tukuypal kedha memayidhin, “Ngalpa bangal midh paru, Yoewsepa bangal nanga ngalpalpa matha wati igalayg muledhe bal, ngalpalpa nubepa kuniya modhabiya moeypa mura, ngalpa nubepa mi gegeyadh nanga aymoedhin?” 16Senabi kaliya thana Yoewsepalpa kedha ya madhin, “Wagel ngalpan thathi mulupa, 17nuy kulay mulaydhin ngoeymulpa kedha, ‘Ngitha bangal nubiya yoewdemine gud pawayar sena ngithamun gegeyadh kedha, ngidh gar nginu tukuypaw gegeyadh gud woeyamar thanamulpa.’ Wa, sena mina ngoeymun gegeyadh, ngoey nginu thathiw Awgadhaw zagethaw moebaygan aymoedhin.” Nuydh na Yoewsepa thanamun yangukudu gasamoedhin nanga kasa may.
18Kalanu thana nungu tukuypal lak thanamun geth kuykul patidamoeyr Yoewsepalpa parunu kedha yaday, “Itha ngoey ngibiya parunu ngoedhe nginu zagethaw moebaygal.” 19Kasa kedha Yoewsepa thanamulpa kedha mulaydhin, “Akan maygi, ngayapa ngaw geth Awgadhiya kulay thoeyaypa lawnga. 20Ngitha ngoena wati doegamuya buwayl thayadhin, kasa Awgadhan nan senabi wati doegam buwayl thoeyay mina doegamuya, buwayl thayadhin mabaygaw igililmaypa kay kuthal poelaypa kayb ngaya nanga igililmayl. Minguz kedha, kulay za midh paru nanga aymaydhin. 21Ngithamulpa wara zaginga aka goesamoeypa, ngath bangal ngitha a ngithamun kaziw kazil bangal danalpathepu.” Kalanu nuydh thana lak mina yadu mamaydhin balbayginga, a gabu yadu mamaydhin. Setha yadu nuydh thanamun ngoenakapul thamamoeydhin.
Yoewsepan Kuthaw Thonar
22Yoewsepa a nungu kazil a nungu kaziw kazil Aykupithunu memayipu, nungu nanga kuthaw thonar gasamoedhin nungu sithabi thonara wathal mura urapu hundred ten. 23Nuy Yoewsepa igililnga memaparu kurusipa nuydh Epliyaman kazil a ngepal imaydhin, a wara nuydh Makayan kazil imaydhin. Nuy Maka waza Manasen kazi.
24Nuy kedha nungu tukuypoepa, “Ngaw um mina amadhan, Awgadhan bangal ngitha danalpathepu, a nuydh bangal ngitha adhapa yoepamoeyne koezi sena ngalaga lag sey yadupalgadhin Abramalpa, Isakalpa, a Yakubulpa.” 25Kalanu Yoewsepa yapu poeybaydhin mabaygoepa kedha, “Ngayapa mulemiw, ngitha bangal Awgadhan yoelapidhe sethabi lagoepa, ngitha bangal ngaw gamu manine a ngithamuniya kalmel?”
26Wa, thonar gasamoedhin Yoewsepa muwasidhin Aykupithunu sethabi thonara nungu wathal urapu andred ten, thana nungu gumu buth pathadhin a kobeniw muynu wanadhin. (Thanamun gamu pini wakasul koey zapul Aykupithunu.)