441Yoewsepa kedha mulaydhin nungu zagethaw moebaygoepa, “Setha thanamun yanal matha koeyma aydu malimoeyr mina mura, a thanamun bokadhzoepul kay mura gimal yaynanob arimoeyr thanamun yanaya.
2Senaw kay ngaw koethil za, silba kap, koewba kuthaygaw yananu gimal arane kalmel nungu puy kunaw bokadhza.” Wa, nuydh zagethaw Moebaygan kedha mina aymoedhin Yoewsepa nubepa midh nanga mulaydhin.
3War boethaynga thana mina inuriya memayidhin thanamun donkil kalmel.
4Thanaka maban sig matha oesiginga Aykupithu goegathoengu, Yoewsepa nungu kuyku zagethaw moebaygapa kedha mulaydhin, “Uzar kazayginga thanamulpa wagel ngidh kay nanga thana gasamidhe kedha kay muledhe, ‘Sena ngitha mingu kedha wati pawa aymoengu, ngoey ngithamulpa nanga ngoey mina pawa aymoengu.
5Ngitha minguz ngaw kuyku moebaygaw silba kap purunu wardhangu senaw nungu woeniw kap, a nuydh senaw wara goewgupa angarngu. Ngitha adhapudhay gegeyadh wati pawa aymoengu.’”
6Nuydh nanga zagethaw moebaygan thana gasamoedhin nuy kedha umay thanamulpa,
7Yoewsepan yangukudu ya midh nanga. Thana tukuypal nubepa kedha mulemidhin, “Ngoey kedha ngoedhal moebaygal lawnga. Ngoey mina ya umamoeypa.
8Ngi ngulayg kedha ngoey Kananangu kuniya madhin bokadhza, ngoey nanga imadhin ngoeymun yanangu a ngoey kay midh paru koethil zapul purunu wardhamoeypa nginu kuyku mabaygaw lagoengu.
9Ngidh kay nanga ngoeymulngu ngabiya imaypa nuyn bangal umamathamoene a dhuray kay bangal ngoeymulngu ngithamun zagethaw mabaygal aymoene.”
10Yoewsepan zagethaw moebayg kedha, “Wa, ngay asin ngithamun senawbi yangukudu ya. Kasa kay kedha senaw kap ngadh nanga mangu, matha nuy kay ngaw zagethaw moebayg aymidhe, ngitha dhuray lawnga.”
11Kalanu thana thanamun yanal mulupa idiman a gud pudhamoeyr.
12Yoewsepan zagithaw moebaygan mura thanamun yanal imaydhin. Kuykuygaw yana kuykaymay kurisipa kuthaygaw yana. Nuydh kap imadhin koewba kuthaygaw yananu.
13Thana nungu Benzoemanan tukuypan thanamun sodhal nubepa koerkak boedhan pakadamoeydhin. Kalanu thanamun donkil rugan balbayg palimoeydhin a lak goegathoepa kuniya tidemidhin.
14Yoewdha a nungu tukuypal thana koezi nanga nuy Yoewsepa matha sin lagoenu. Thana nubepa parunu kuykul patidamoeyr.
15Nuy Yoewsepa kedha thanamulpa, “Ngitha za miyay aymoedhin? Ngitha ngulaygal kedha, mi mabayg mangu, ngaw zagethanu sepa, ngitha sobaginga imiz ngaw goewguwam zoepun.”
16Yudha thanamun kuykuyg kedha muliz Yoewsepalpa kuniya, “Ngoey gar ngibiya yoewdhemin, ngoey kedha ngoedhal mabaygal lawnga. Ngoey kay ngibepa midh, ngoeymun mina pawa yakampa. In nubi sirisrin ngaru Awgadhaw kuniya tiday ngoeymulpa, ngoeymun kulay thonaraw wati pawapa. Ngoey bangal mura kalmel nginu zagethaw mabaygal wara nuy senaw kap ngabiya nanga.”