331Yakubu nuydh imadhin kedha Isaw a kalmel nubiya nungu mabaygal mura 400, nuydh Yakubu ipi kazil dhadhiya mamaydhin kalanu Leyaw, Reysoelaw muliya a nungu wara ukasar ipiya zagithaw moebaygiya. 2Nuydh kulay nungu wara ukasar ipiya zagethaw moebaygiya palamun kazil wanaydhin, kalanu Leya a nanu kazil a moeygoepa Reysoel a nanu kazi Yoewsepa palay mina wagel. 3Yakubu nungu mabaygoengu kulay uzaraydhin nuy nanga koezi woelmay Isawalpa nuydh kasa kulay seben thonaralnga nungu kuyk patidhadhin boeradhoerapa mulupa Isawalpa apapudhayn.

4Kasa kedha Isaw Yakubulpa pa yabuya tharizoelmaydhin. Isaw nanga yakubun gasamoedhin Isaw Yakubuniya dhadha goeray woeynaydhin a gud thapamoedhin palmun kalmel kidhakidhan may. 5Kedha nanga nuy Isaw nagaydhin nuydh imaydhin yoepkazil a kazil nuy yapu poeybaydhin kedha, “Itha ngalagaw moebaygal ngibiya puzimoeypa?” Yakubu kuniya Isawalpa kedha, “Itha Awgadhaw ngayapa poeybayzimayl ipi kazil a zagethaw moebaygal, nungu kapu kozan.”

6Kalanu Yakubun wara ukasar zagithaw moebayg ipi a palamun kazil kalmel. Isawalpa mura thanamun kuykul patidamoeyr. 7A Leyange lak kedha nanu kazil kalmel mura kuykul patidamoeyr, a moeygoepa Yoewsepa a Reysoel palamun kuyk pathidhamoedhin.

8Isaw yapupoeybaydhin kedha, “Setha dhuray mabaygal midh ngath ngaya nanga gasamoeyngu? Sew aykap miyay?” Yakubu nubepa kuniya kedha, “Kobegadh kedha nginungu matha ngoedhagidhapa gasamoeypa.” 9Kasa kay kedha, Isaw kedha mulaydhin, “Ngaybiya matha ngoedhagidh ngayapa ngaw tukuyap setha sew ngibepa setha ngibiya mi zoepul nanga?”

10Yakubu kedha Isawalpa, “Maygi! Ngay gar yoewdhiz ngath kay nanga nginu matha ngoedhagidh gasampa ngidh kay ngaw sibwanan gasamar ngi ngaw mina kapu igalayg kayb ngath nginu paru yawaypa ngoedhe Awgadhaw paru ngayapa. 11Ngay gar yoewdhiz ngibiya matha gasamar ina ngaw sibwanan ngibepa Awgadhan ngoedhalnga ngoena sibwanaypa mura ngaw ubilmayl nuydh ngayapa aymoeypa.” Yakubu Isawalpa matha umay a kurusipa Isaw yakubulpa karngemidhin a madhin senabi sibwanan Yakubun.

12Wa, Isaw kedha, “Ngalpa ngadha palemipa mabapa, a ngay kay kulay uzaripa.” 13Yakubu kedha Isawalpa, “Ngi ngulayg kedha itha kazil moegawgigal a ngath koepa mamuypa a itha tetel uruyl a thanamun kazipa wakay-thoemamipa. Ngalpa bangal nanga thana mabapa mamayine nanga urapun goeygoeypa itha bangal mura umamayl. 14Ngay ngibiya yoewdhiz, kulay uzar a ngay bangal gabudhan wagel senawki imaypa sobaginga bangal kalmel itha mura mamuyl a tetel uruyl a thanamun kazil kurusipa bangal ngath ngin gasamoene Idomoenu.”

15Wa, Isaw kedha, “Ngath dhuray ngaw mabaygal ngibiya wanepa?” Yakubu kedha, “A, kasa wanar wakay thoemoemayg ngaw ubi kedha, ngath matha nginu ubilmayl aymoeypu.”

16Senawbi kaliya Isaw kuyk aymoedhin mab kuniya Idomoepa. 17Kasa kedha Yakubu nuy Sukothoepa uzaraydhin nuydh ngalaga nanga nubepa nungu geth lag moeydhadhin iradh lag nungu tetel uraypa nan sena kedha zoenguz senabi lag kedha thoeraypa Sukoth.

18Nuy nanga kuniya tidaydhin Mesopoetaymiyangu nuy mura balbayginga mangaydhin Sekoemoenu Kananaw doegamunu. Nuydh nubepa mudha thoemay lag si aymoedhin senabi koey goegathoepa amadhan. 19Nuydh nan senabi boeradhar barpudhoedhin Amoran buwayngu modhab mura 100 silba bokadhzapul. Nuy Amor waza Sekoman thathi. 20Nuydh Yakubu kalanu olta moeydhadhin a nel tharadhin kedha El, Isaraylaw Awgadhaw nel.,