Isaka Woenab Poeybadhin Yakabulpa
271Isaka nuy nanga koey thathi aymaydhin nanga nuydh zapul moegina yawaymoeypu, nuydh nungu garkaz kazi thuradhin Isawan a kedha mulaydhin, “Ngaw kazi!” Nuy kedha Isaw, “Midh, ngay in.”
2Kalanu nuy Isaka kedha mulaydhin, “Ngidh ngoena iman a? Ngay koey thathi, ngaw amadhan um. 3Ngidh nginu gagay a thayak mamamar, uzar ngayapa kay tetel uruy ay kay mathamar. 4Ngayapa kay mina kapu mithal ay aymoene a kalanu kay ngayapa manine. Aygudaw kalanu kay ngath ngibepa ngaw moeygoepa woenab poeybaypa, wagel bangal ngaw kuth.”
5Isaka nanga yadu umay Isawalpa, nadh Rebeka karngimir. Wa nuy gar nanga Isaw aypu lumaypa mizin nanga 6na Yakubulpa kedha mulaydhin, “Ngath nginu thathiw yaday karngemidha, nuy midh nanga umedha Isawalpa kedha, 7‘Ngayapa tetel uruy ngapa a giya kay palane. Aygudaw kaliya kay ngath ngibepa woenab maypa Awgadhaw parunu, wagel kay ngaw kuth.’” 8Na kedha Rebeka, “Ngoezu kazi ngayapa karngemir ngay midh kay na mulepa 9Kedha uzar setha ngalpan nanil, ngoebalpa seyzi ngapa ukasar kayn koey ngabi mamamar; ngath kay giya palimpa dhuray mithal ayde nginu thathipa, nubepa mina ayde. 10Ngidh kay kalanu nubepa muypa agepa. Ayngu kalanu nuydh ngibepa woenab poeybaypa, wagel nungu kuth.”
11Nuy kedha Yakubu nungu apupa, “Ngi ngulayg kedha Isaw koey gamu magadhalnga a ngay gamu magadhoegig. 12Wara kedha, ngaw thathin nanga kay nanga gamu thoeraypa nuy kay ngulayg oesipa a sena kay kakal ngaw karum poelay nubepa, a ngath kay mura wati za ngayapa thuraypa, woenab lawnga.”
13Nungu apu kedha, “Mi wati pawa ngibepa, kay ngapa ngayapa, nguzu kazi kasa aymar ngay ngibepa midh nanga mulema, uzar sepal ngapa nani mamamar.” 14Wa, nuy gar uzariz gasamoeman a nabepa mamaman. Nadh kalanu giya paliman kedha Isakalpa mi giya palay koey ubilnga.
15Isawan kapu rugal nabiya mer lagoenu muynu. Kalanu nadh sethabi rugal Yakubulpa mamayin ubamoeypa. 16Nadh nubiya tetel uruy goengawl nungu gethiya a mudulya wara mura gamu magadhoegimiya. 17Kalanu nadh nubepa madhul a kunaw susul kusuman.
18Kalanu Yakubu uzariz nungu thathipa, a kedha mulaydhin, “Bab!” Nuy Isaka kuniya, “Miyay, ngi nga ngipelngu?” 19Yakubu kedha, “In ngay nginu kuykuyg garkaz kazi Isaw; ngath nginu ubilnga aymoenu. Igi thanur aygudoepa. Ayde itha ngath ngapa kusumoenu. Nuydh kay ngidh ngayapa woenab poeybaypa.”
20Isaka nuy kedha, “Ngidh midh paru mina sobaginga gasaman ngaw kazi?” Yakubu kedha, “Awgadhan ngoena ibupuydhanu sobaginga gasamoeypa.” 21Isaka kedha Yakubulpa, “Aya ngapa gar amadhan thami nuy kay ngath ngin gamu thuraypa. Nuy ngi mina Isaw a?” 22Yakubu amadhan thamiz nungu thathipa, nuy nungu thathi kedha, “Nginu yangu wakay Yakubun yangu wakay, kasa kay kedha nginu geth Isawan geth.”
23Isaka Yakubun ngurpayginga, minguz kedha nungu geth gamu moegadhalnga, kedha Isawan midh nanga. Nuydh kay wagel kay woenab Yakubulpa maypa. 24Nuy lak mamu yapupoeybaydhin, “Ngi mina ngaw kuykuyg garkaz kazi a?”
Nuy kuniya, “Wa, ngay mina nginu kuykuyg garkaz kazi.”
25Isaka kedha, “Ngayapa ukamay ay madhu ngapa, ngath kay na aygud muwasipa ngath kay ngibepa maypa woenab.” Yakubu nubepa ayde kusuman kalmel umal nguki. 26Kalanu nungu thathi nubepa kedha mulaydhin, “Ngapa amadhan thami a ngoena gud thapamar ngaw kazi.”
27Yakubu nanga nubepa amadhan thamiz nanga guda thapamoeypa, Isaw nungu rugaw ganu madhin, kalanu Isaka woenab Yakubulpa poeybaydhin. Nuy Isaka kedha yangukudu ya madhin nungu kazipa,
“Ina nabi kapu ganu ngoedhe bupaw ganu
Awgadhaw woenab ngalaga nanga.
28Awgadhan kay dhibag woeyaypa daparngu,
senabi boeradhar nuy bangal kay aydenga.
Nginu kun a umal nguki ngaru bangal koeyza.
29Mura lagal a mabaygal apasimoeypu ngibepa.
Ngi bangal thanamuniya gimal
a nginu buway matha kedha
nginu apuwaw kaziw kazil bangal ngibepa apasimoeypu,
a thana senaw ngaya nanga ngin wati bag thoeyaypa,
senawbi wati za bangal thanamuniya woenaripu,
a setha ngaya nanga ngibepa
kapu yangukudu ya umamoeypa a kapu woenab ngibepa,
wa, matha kedha woenab thanamuniya kalmel.”
Isaw Yoewdhiz Isakalpa Woenaboepa
30Isaka nuydh woenab Yakubulpa poeyban. Munangasin nuy Yakubu sizi uzariz, Isaw gar mangaydhin aypu lumayzimayngu. 31Nuydh Isaw lak kedha mina kapu mithal madhul aymoeyn, kalanu nungu thathipa mamayin. Nuy kedha mulaydhin, “Bab! Igi thanur aygudoepa itha ngath ngapa kusuman na kay ngidh kalanu ngayapa woenab poeybaypa.”
32Isaka nuy kedha yapupoeybiz, “Ngi nga?” Nuy kuniya mulaydhin kedha, “In ngay nginu kuykuyg garkaz kazi Isaw.” Nuy Isaka madhu pamiz, mamu mina koeyma gar lupan. 33Nuy kedha mulaydhin, “In kulay nga mangema, a ngi nga nge, ngayapa kulay ngadh ayde kusumoenu? Ngay purathima, ngath ngaw moeygoepa woenab nubepa manu, sena nungu za pamoeygoepa.”
34Nuydh nanga Isaw karngemin, nungu mamu kasa may mina koey gimiya umay kedha, “Ngayapa gar mar nginungu woenab, Bab!” 35Nuy thathi kedha, “Nginu tuykuyap in kulay mangema ngoena ngoelkanu. Nuydh gasamoenu nginu woenab.”
36Isaw kedha, “Ina nungu ngayapa ukasar thonaralnga aymiz kedha sagul poelay a-ke...kedha zoenguz nungu nel Yakubu, nuydh ngaw mina za madhin, ngaw kuykuy kaziw kupay, ina mamu a woenab! Na kay ngidh moegina kuniya thoeyayginga ngayapa?”
37Isaka kedha, “Ngath nuyn muwasinu, kuykulnga aymoenu ngibiya. A ngath mura nungu tukuypal nungu zagethaw mabaygal aymoenu, a ngath nubepa kun a umal nguki mamamoenu. Ngay kedha thonara zagig ngibepa ngaw kazi.” 38Isaw matha umay nungu thathipa kedha, “Ngibiya sey kedha urapun mayginga, ngayapa gar lak kedha woenab mar ngaw Bab.” Kalanu gar nuydh Isaw koey may puydhan.
39Isaka nubepa kedha mulaydhin,
“Ngibepa wara dhibagoepa
nginu boeradharanu pudhaypa lawnga,
a ngibepa boeradhaw aypa gasamoeypa lawnga.
40Ngi a nginu buway bangal gegeyadh niparuy,
a nginu kuyay thurik ngaru nginu gethaw rug.
A ngi bangal nginu kuythaygaw zagethaw mabayg aymoene,
kasa kay kedha ngitha bangal a kuniya nanga,
ngitha bangal guythuyane nginu tukuypaw danalpoethay.”
Yakubu Gamu Zilmaydhin Isawalngu
41Isaw nuy yagiyasidhin Yakubulpa, kedha zoenguz kedha Isaka woenab poeybadhin Yakubulpa. Isaw nungu wakay thoemamay kedha, ngaw thathiw um amadhan, ngath bangal Yakubun uma mathamoene.
42-43Rebeka nadh nanga gasamoedhin Isawan wakay thoemamay midh nanga, Yakubulpa uma mathamoeypa nadh Yakubu yadu thuradhin. Na kedha nubepa, “Ngidh kay ina aymar nguzu yangukudu, nginu tukuypoepa kedha, nuydh ngin uma mathamoene bangal. Uzar kedha thonara nginu wadhumalpa Leyboenalpa, nuy sey Arananu. 44-45Sew bangal meparu moegina kuykuthalnga, nginu wadhumiya, mamu bangal nginu tukuypaw ngoenakap moegina gabu asine, a nginungu bangal yakanuridhe kedha, ngidh nubepa miza aymoedhin. Kalanu bangal ngath ngibepa mabayg wayane, ngapa kuniya maypa. Mingu ngath ngoezu kazi kalmel guythuyamoene.”
Isaka Wayadhin Yakubun Leyboenalpa
46A war na mulaydhin Isakalpa, “Nguzu gamu kawbasin Isawan war lagaw ipingu. Yakubu bangal nanga lak Ithaythaw ngoewakaziya garwoeydhamidhe, ngay kasa um miyay.”