Abraman Mamal Kazi Awgadhoepa Poeybayzinga
221-2Kalanu Awgadhan Abraman nuthadhin nubepa wal miyaydhin kedha, “Abrama.” Abrama nuy kuniya nubepa, “Wa, in ngay.” Awgadh kedha, “Ngi a nginu urapun mamal kazi Isaka uzarmoeriw wara koey padoepa, padaw lag nel Moriya ngath ngibepa yadu palgane bangal. Ngidh nuyn bangal ngibiya kalmel manine a padoenu gimal ngidh nuyn muypu nathane ngayapa.”
3Bathaynga nanga goeyga nuy Abrama dan palaydhin, urapun nungu donki gasaman. Nuydh nuyn donki balbaytidan rugapa oengaypa. Nuydh thurimadhin nungu ukasar gamu zagethaw mabaygal a nungu kazi Isaka. Watharal tidadhin, thana geth wanemidhin sena mi lag Awgadhan nubepa yadu palgadhin. 4Thoeri goeygi kaliya Abrama nuydh kadaypa nagaydhin, senabi pad imadhin. 5Nuy kedha nungu niyaykazipa, “Ngipel matha kow donki danalpoethaypa; ngay a ngaw kazi koezi uzarampa kadaypa Awgadhoepa thawmaypa, kalanu ngalbe ngapa kuniya ngipelpa.” 6Nuydh watharal gasamoeydhin, nungu kaziw thabaynu wanadhin, nubepa oengaypa. Nuydh nungu kusaygan koey gi a muyngu muthukul mamayidhin, palay kalmel uzarmoedhin.
7Isaka nungu baban tharan kedha, “Bab.” Nuy kuniya muliz kedha, “Miyay ngaw kazi.” Nuy kazi kedha, “Ngath imanu ngibiya muthukul a watharal, kasa kedha mamuyginga muypu nathaypa.” 8Nuy kuniya nungu kazipa kedha, “Matha Awgadh nuydh nubepa maypa mamuy.” Palay matha kalmel ulmempa.
Abrama Olta Moeydhadhin
9Kurusipa gasaman senabi lag Awgadh kulay mulaydhin. Nuy Abrama kulan garwoeydhamiz oltapa aymaypa; watharal balbay tidadhin si gimal. Nuydh nungu kazi kunumoedhin, nuyn watharnu gimal wanadhin oltanu. 10-11Nuydh nungu gi gasamoedhin kazipa mathamoeypa mer, Awgadhaw Angela nubepa wal miyaydhin daparoengu, “Abrama, Abrama!” Nuy kuniya, kedha muliz, “Wa in ngay.” 12Angela lak mulaydhin, “Nginu kazi poegayg, nuyn wanar. In ngayapa kakal ngi mina mabayg Awgadhaw ubilmay mura aymoeyrngu nungu thawmayzi mabayg. Ngi lawnga kedha, ngidh nginu kazi Awgadhoepa poeybayginga.”
13Abrama nuy kalanu nagaydhin, garkaz mamuy imadhin, nungu on sirisirnu alalayzinga nuydh senawbi mamuy gasamadhin kalanu muypu nathadhin senabi oltanu, nungu kaziw buthapa. 14Abrama nuydh senabi lag nel tharadhin kedha, Awgadhaw Poeybazinga. Kedha zoenguz kedha umamoeypu kurusipa kayib kuykulmay pad say kay gimal ayman, ngalpalpa ibupuydhay ayman.
15Kalanu Awgadhaw angela lak wal mizin nubepa kedha, “Ngath ngaw yawoedhayzinga koey zageth pathidhan, kedha zoenguz ngay waza Awgadh. 16Ngath ngibepa ya wadhan kedha, ina mina ngay Awgadh kedha yadu umepa, ngaw ngibepa woenab a nginu kaziw kazil ngaru bangal mina koey garsar ngoedhe lak buthul thawala midh nanga a dapraw thithuyil midh nanga; minguz kedha, ngidh nginu kazi kuniya gasamoeyginga. 17Kedha zoenguz kedha nginu kaziw kazil bangal ngaru koeyma boeradhar gasampu thanamun wati igalgoengu. 18Mura buwayl ngayapa bangal umamoeypu woenaboepa ngath ngibepa midh nanga woenab poeybadhin. Minguz kedha ngidh ngaw ubilnga aymoedhin.”
19Kalanu nuy Abrama a nungu kazi, mulupa pagamoedhin zagethaw mabaygoepa. Thana mura kuniya Birsibapa. Abrama nuy si meparu.
Nayon Kaziw Kazil
20Wagel bangal Abrama ya gasamadhin, karngemidhin kedha nungu tukuyap Nayo lak kazilayg. Nungu ipi Milka palamun kazil eyt mura thurkiyay kazil. 21Kuykuyg kazi nel Uz, nubiya wagel Buz, a nubiya wagel Kemwel. Kemwel nuy Araman thathi.
22Wara Nayon kaziw nelay itha kedha Kesed, Azo, Pildas, Zidlal a moeygoepa kazi Bethwel. 23Bethwel nuy lak kazilayg urapun nungu Yoepkaz kazi nel Rebeka. Wa itha Nayon ipi Milka palamun eyt mura thurkiyay kazil.
24Wara yoepkaz nuydh nungu zagethaw mabaygoengu gasaman a ipipa kidh thayadhin. Nanu nel Rewma. Nadh kazi madhin nungungu Nayolngu Kaziw nelay kedha, Teba, a Gayam, a Tayas, a Maka.,