Gugu Ubidh Thoeyayzinga Mura Ayman
21Wa, nuydh nubi gugu ubidh thoeyayzinga mura muwasidhin. 2Goeyga seben nanga Awgadh ngoena pudhaydhin, nungu zageth mura muwasidhin nubi gugu ubidh thoeyayzinga nuydh na aymoedhin nuy kulay mi zagithan nanga meparu. 3Nuydh nan adhapa thamadhin, nubepa goeyga woenabalnga. Minguz kedha nuy senawbi goeyginu ngoena pudhaydhin mura nubi gugu ubidh thoeyayzimay zagethoengu; nan mina muwasidhin. 4Senaw nuy kedha kuniya nubi gugu ubidh thoeyayzinga sama woeydhadhin.
Apaw Lag Nel Edhoen
5Wa, nuydh Awgadhan nubi gugu ubidh thoeyayzinga nanga aymoedhin, boeradhar wara zaginga puyginga, wara kedha kasa kobegadh puy kapul malguy adhayginga, minguz kedha nuydh Awgadhan ari woeyayginga, a wara mabaygoeginga boeradhoeraw zagethapa. 6Kasa kay kedha woer nanga apaz kadaypa nan boeradhar woernu mayparu boeradhoeraw poediya.
7Awgadhan kalanu mabayg aymoedhin boeradhoerangu, nuydh igilaw gub poeybadhin pitiya nungu aymoeyzi moebaygiya nuy mabayg kalanu igililnga aymaydhin ngoena woelaylnga ngalpa midh nanga. 8Awagadhan mamu a apaw lag aymoedhin nanu nel Edhoen sager doegamunu, nuydh kalanu nungu aymoeyzi moebayg si wanadhin.
9Nuydh kasa mura puyl aymoeydhin mina kapu ngoedhalmayl a, kapu goemulmayl, a aypuyl koewsalmayl. Mina matha dhadhal nanga senabi apaw loegoenu ukasar puy, wara puy nuy igilaw puy, a wara puy mura ngulaygaw puy. Nuy mura ngulayg poeybaypa kedha, mina pawa midh a wati pawa midh. 10Senabi apaw lagiya nanga, koesa adhiya pungaypu nadh mura apaw lag woernu mayparu kalanu nabiya Edhoeninu nanga na koesa dhadhiya miyaydhin po koesal aymoeydhin. 11Koeykoeyne koesa nel Pison; na mura yoewdhepu Abelaya. 12(Kapu bamagidh koethil kulal ngalagaz nanga imaydhin, a dhuray kapu goemul koethil kulal a kapul ganul zoepul.)
13Wara koesa nanga nanu nel Geyon, na yoewdhepu nanga lag nel Kus sike adhiya. 14Ukamodhabayg koesa nanga nanu nel Tigris; na yoewdhepu Asiriya sager doegamuya a po koesa nanga nanu nel Ewprates.
Awgadhan Kalanu Wanadhin Senawbi Garkaz Apaw Lagoenu
15Nuydh Awgadhan kalanu senawbi garkaz wanadhin Apaw lag nel Edhoen zagethapa danalpoethaypa. 16Awgadh kedha mulaydhin nubepa, “Itha mura puy koewsal ngibepa aygudoepa ubipa apaw loegoenu. 17Matha senawbi puy lawnga, mina ngulaygaw a wati ngulaygaw puy koewsal ngalaga nanga puydhemipa. Ngidh bangal purthayg. Ngidh bal nanga purthane ngi bangal senawbi goeygoeynu um medhedhe.”
18Kalanu nuy Awgadh kedha mulaydhin, “Garkazoepa matha ngoedhagidh lawnga nungu kusayg moeypa, ngath bangal nubepa wara kapu ngoedhal igalayg aymoene nubepa ibupuydhaypa.” 19Nuydh kalanu boeradhoer garwoeydhamoedhin a mura kay kedha ubipa uruyl aymoeydhin tetelmayl a boethalmayl kalanu nuydh nungu aymoeyzi moebaygoepa imaypa kusumoedhin nubepa nel thoeraypa.
20Kalanu nuydh nungu aymoeyzi moebaygan mura nelay tharaydhin tetel uruyl a boethal uruyl, kasa kedha thanamulngu wara kedha urapun matha ngoedhagidh lawnga nubepa pasiw puzi moebayg, a nubepa ibupuydhaypa.
21Wa, Awgadhan midh madhin, uthuy yoewthadhin nungu aymoeyzi moebayg a kalanu bero ridh adhapa madhin, a nan kay pisuypa gudmathamoedhin kuniya goengaw. 22Nuydh sizi berongu yoepkaz aymoedhin kalanu nuydh nan nubepa oengaydhin imaypa.
Garkaz Kedha Mulaydhin, “Mina Ngaw Ridhangu a ngaw Ngoedhalnga”
23Nuy mabayg kedha mulaydhin, “Mina kuthapa kay, ngaw ridhangu mina ngaw ngoedhalnga a ngaw goengawlngu.” Nuydh nan kedha tharadhin yoepkaz. Minguz kedha nan nungu goemungu aymoedhin. 24Kedha zoenguz garkazin kayb apuwal thathil wanepa a yoepkaziya garwoeydhamoeypa, kalanu palamun gamu urapun aymiz*Palay lak lawnga ukasar moebayg wara Mareko 10:6-8 geth tidi. kedha zoengu kayb garkaz yoepkaz niyaypa yoelpaypa. 25Garkaz a yoepkaz palay kulay kasa kupal palmun gamu wara zaginga sepalbi thonara palay kidhakidhan azirgig.

*2:24: Palay lak lawnga ukasar moebayg wara Mareko 10:6-8 geth tidi.